Өзбекстанда еңбек нарығының талаптарына сай заманауи білімі мен практикалық дағдылары бар орта буын мамандарын даярлауға ерекше көңіл бөлінуде. Осы бағытта кәсіптік білім беруді жұмыс берушілердің сұранысымен ұштастыру, озық шетелдік тәжірибені енгізу және дуалды білім беру жүйесін кеңейту бойынша жүйелі жұмыстар атқарылып келеді.
Үргеніш қаласында құрылған Хорезм озық кәсіби шеберлік техникумы да осы мақсаттарға қызмет етеді. Оқу орнын салуға мемлекеттік бюджеттен 72,4 млрд сум бөлінген. 5,2 гектар аумақта 1 100 орындық екі оқу ғимараты, 300 орындық жатақхана, спорт залы, 200 орындық асхана және заманауи құрал-жабдықтармен жарақталған екі оқу шеберханасы салынған.
Техникумда Германия, Швейцария, Ұлыбритания, Қытай және Оңтүстік Кореяның озық білім беру бағдарламалары негізінде оқыту жолға қойылған. Ал дуалды білім беру жүйесі теориялық білімді өндірістік практикамен тікелей ұштастыруға мүмкіндік береді.
2026–2027 оқу жылына 11 мамандық бойынша 200 дарынды жас емтихан арқылы іріктеліп алынған. Оқу процесі жұмыс берушілермен бірлесіп ұйымдастырылып, түлектерді алған мамандығы бойынша жұмыспен қамтуға ерекше мән берілуде.
Техникум Хорезм облысындағы өзге де кәсіптік білім беру ұйымдары үшін заманауи практикалық база қызметін атқарады. Өңірдегі білім беру мекемелерінің шамамен 4 300 оқушысы мұндағы шеберханалар мен зертханаларда тәжірибеден өтеді. Осындай озық кәсіби шеберлік техникумдарын Қарақалпақстан Республикасы мен басқа да өңірлерде кезең-кезеңімен құру жоспарланып отыр.
Мемлекет басшысы оқу орнының аумағында орналасқан Кәсіптер қалашығын да аралап көрді. Мұнда жастардың қызығушылығы мен қабілетін ерте анықтап, оларды нақты мамандықтарға бағыттауға қажетті жағдай жасалған.
Кәсіптер қалашығында «Өзің жасап көр» қағидаты негізінде оқушылар түрлі заманауи құрал-жабдықтармен тікелей жұмыс істеп, практикалық дағдыларын жетілдіреді. Мұнда еңбек нарығында сұраныс жоғары көлік және логистика, өнеркәсіп пен құрылыс, сервис, ауыл шаруашылығы және «жасыл» энергетика бағыттары қамтылған.
Кешен ірі жұмыс беруші кәсіпорындармен бірлесіп жұмыс істейді. Бұл жастарды кәсіпке бағдарлаудан бастап, практикалық дағдыларын қалыптастыру және болашақта жұмыспен қамтуға дейінгі бірыңғай жүйені қалыптастыруға мүмкіндік береді.
Мемлекет басшысы жастарды заманауи еңбек нарығында сұранысқа ие мамандықтарға сапалы оқыту, білім беру бағдарламаларын жұмыс берушілердің қажеттіліктеріне сай жетілдіріп отыру және бұл тәжірибені басқа өңірлерде де кеңінен енгізу маңызды екенін атап өтті.
