Салтанатты шара басында Өзбекстан ұлттық құрамасының ойыншылары алаңға шықты.

Мемлекет басшысы стадионға жиналған отандастарды, футбол жанкүйерлерін, ұлттық құрама мүшелерін, бапкерлер штабын және спорт қауымдастығы өкілдерін үлкен футбол мерекесімен құттықтады.

Бүгінгі күн өзбек футболы үшін тағы бір тарихи белес екені, ұлттық құрамамыздың АҚШ, Мексика және Канада жасыл алаңдарында өтетін әлем чемпионатына зор сенім әрі ақ тілектермен аттанып бара жатқаны атап өтілді.

Мемлекет басшысы футболшыларымыз елге ұмытылмас қуанышты сәттер сыйлағанын айтып, оларға, оларды тәрбиелеп өсірген ата-аналарына, ұстаздары мен бапкерлеріне, ұлттық құраманың барлық мүшесіне күллі халық атынан шынайы алғыс білдірді.

Салтанатты жиында футбол жанкүйерлерінің ұлттық құрамаға деген сүйіспеншілігі мен адалдығы ерекше атап өтілді. Президент жеңісті күндерде де, қиын сәттерде де футболшылармен бірге болып, оларды әрдайым қолдап келе жатқан отандастарға ризашылығын жеткізді.

Фан-клубтардың қызметі де ерекше аталып өтті. Олар ұлттық құраманың ойындарын тек трибунадан тамашалап қана қоймай, әрбір кездесуде өзбекке тән қайталанбас қолдауымен «он екінші ойыншы» міндетін лайықты атқарып келеді. Мемлекет басшысы олардың әлем чемпионатында да мыңдаған отандасымызбен және шетелдегі қандастарымызбен бірге футболшыларымызға қолдау көрсететініне сенім білдірді.

Мемлекет басшысы елімізде футбол әлдеқашан әрбір отбасының жақын серігіне айналғанын атап өтті. Спортшыларымыздың жетістіктерінен жігерленген жас ұрпақ арасынан болашақта жаңа чемпиондар шығатынына сенім білдірілді.

Кейінгі жылдары Жаңа Өзбекстанда спортқа көрсетіліп жатқан зор қолдау, әрбір өңірде бой көтеріп жатқан ірі спорт нысандары, елді мекендерде ашылып жатқан кәсіби футбол академиялары және жуырда жұмысын бастаған Ұлттық футбол орталығы жастардың жаңа жетістіктерге жетуіне негіз болып отырғаны айтылды.

Сондай-ақ былтыр Ташкент қаласында 100 гектардан астам аумақта 5 ірі спорт кешенін қамтитын Олимпиада қалашығының құрылысы аяқталғаны, ал Жаңа Ташкентте ФИФА талаптарына толық сай келетін 55 мың орындық зәулім стадион бой көтеріп жатқаны атап өтілді. Мұндай заманауи нысандар елімізде беделді халықаралық жарыстар өткізуге және спортшыларымызды жаңа биіктерге жетелеуге қызмет етеді.

Мемлекет басшысы ұлттық құрама мүшелеріне жолдауында, халқымыз ақ батасын беріп, мундиалға зор үмітпен шығарып салып отырғанын айтты. Алда Португалия, Колумбия және Конго құрамаларымен маңызды кездесулер күтіп тұрғаны, футболшыларымыздың алаңға жігерлі әрі сенімді түрде шығуы қажеттігі айтылды.

– Мына нәрсені ешқашан ұмытпаңыздар, біз әрдайым сіздермен біргеміз. Нағыз өзбекке тән қайсарлық, төзім мен ерік-жігерлеріңіз арқылы әдемі әрі сенімді ойын көрсетіп, баршамызды қуантады деп сенеміз, – деді Президент.

Сөз соңында Өзбекстан Республикасының Мемлекеттік әнұраны орындалды.

Президент Шавкат Мирзиёев Өзбекстан ұлттық құрамасының мүшелерімен естелік суретке түсті.

Концерттік бағдарлама ұсынылып, шара соңында ұлттық құраманың жолдастық кездесуі өтті.