Соңғы тоғыз жылда облысқа жоғары табысты жұмыс орындарын құру мақсатында 7,5 миллиард доллар инвестиция тартылып, 9,7 мың жаңа өндірістік қуат іске қосылды. Шағын және орта бизнес жобаларына 33 триллион сумнан астам несие бөлінді.
Нәтижесінде халықтың нақты табысы екі есеге өсті. Өнеркәсіп пен құрылыста жұмыспен қамтылғандардың үлесі 18 пайызға, қызмет көрсету саласында 55 пайызға жетті. Кедейлік деңгейі 4,4 пайызға дейін төмендеп, жұмыссыздық екі есеге қысқарып, 4,5 пайызды құрады. 72 махалла «жұмыссыздық пен кедейліктен ада» аумаққа айналды.
Облыстың көлік және туристік инфрақұрылымы да жүйелі түрде жаңартылып келеді. Кейінгі тоғыз жылда 280 қонақүй мен қонақ үйі салынып, қонақүй қоры төрт есеге артты, 11 жаңа туристік нысан іске қосылды. Соңғы бес жылда шетелдік туристер саны 10 есеге көбейді.
Хиуа қаласындағы «Farovon Khiva Hotel» қонақүйінде Президент Шавкат Мирзиёевтің қатысуымен Хорезм облысындағы жаңа жобаларды іске қосу және перспективалы бастамалардың құрылысын бастау рәсімі өтті.
– Жаңа Өзбекстандағы реформаларымыздың алғашқы күндерінен бастап жаңа жұмыс орындарын ашу мен заманауи өндірістік қуаттарды іске қосуды негізгі бағыттардың бірі ретінде белгіледік. Осыған орай Хорезм облысына қатысты да арнайы бағдарламалар мен шешімдер қабылдап, қаржысы мен жауапты тұлғаларын нақтылап, жұмыстарды жүйелі ұйымдастырып келеміз, – деді Мемлекет басшысы.
Егер 2016 жылы Хорезм облысына небәрі 30 миллион доллар шетелдік инвестиция тартылса, 2026 жылы бұл көрсеткіш 2 миллиард доллардан асады.
Жыл басынан бері Үргеніш және Хиуа қалаларында, Топыраққала және Үргеніш аудандарында химия, машина жасау, құрылыс материалдары мен туризм бағыттарындағы жаңа жобаларды жүзеге асыруға қажетті жағдайлар жасалды. Өнеркәсіпке арналған 195 гектар жердің санатын өзгерту, электр және жол инфрақұрылымын жақсарту үшін 100 миллиард сум бөлу мәселелері шешілді.
Сонымен қатар, Тәуелсіздік мерекесі қарсаңында Үргеніш халықаралық әуежайынан Хиуаға дейінгі электрлендірілген теміржол желісі пайдалануға берілді. Үргеніш–Хиуа ақылы автомобиль жолы да іске қосылуда. Бұл – Өзбекстандағы алғашқы ақылы автомобиль жолы. Оның арқасында Үргеніштен Хиуаға жету уақыты 45 минуттан 20 минутқа дейін қысқарады.
– Осы жұмыстарымыздың жалғасы ретінде бүгін сіздермен бірге құны 176 миллион доллар болатын 12 жобаны іске қосамыз. Сонымен қатар шетелдік серіктестердің қатысуымен құны 7 миллиард 424 миллион доллар болатын 15 жаңа өндірістік қуаттың құрылысын бастаймыз, – деді Президент.
Атап айтқанда, Топыраққала ауданында Біріккен Араб Әмірліктеріндегі серіктестермен бірлесіп, құны 6 миллиард доллар болатын экологиялық авиациялық отын өндіру жобасы жүзеге асырылады. Жобаға Қытайдың «Sinopec» компаниясы тартылды. Қазір жер телімін дайындау және жобалық құжаттарды әзірлеу жұмыстары басталды.
Словакиялық серіктестермен 5 мың гектар құмды жерді игеру және құны 170 миллион доллар болатын биоэтанол өндіру кәсіпорнын құру жоспарланған. Қазіргі таңда 1,5 мың гектар аумақта практикалық жұмыстар басталды.
Үргеніш қаласында жапониядық серіктестермен құны 30 миллион доллар болатын 250 орындық қонақүй және сауда-ойын-сауық кешені салынуда. Оны 2027 жылы толық іске қосу жоспарланған.
Саудиялық серіктеспен облыс орталығында заманауи қазандық салынып, 183 көпқабатты тұрғын үй мен 37 әлеуметтік нысанды жылу және электр энергиясымен қамтамасыз ететін қуаттар құрылады. Түркиялық серіктестермен мемлекеттік-жекешелік әріптестік негізінде офтальмологиялық клиника ашылады.
Үргеніш ауданында кореялық инвесторлардың қатысуымен республикада алғаш рет қалдықтарды тұйық цикл негізінде қайта өңдеп, 71 мегаватт «жасыл» энергия өндіру жобасы жүзеге асырылады. Оған 100 миллион доллар инвестиция салынады.
Сондай-ақ Хиуа қаласына іргелес 26 гектар аумақта 120 миллион долларлық «Сахро юлдузи» заманауи туристік кешені, Үргеніш ауданында 26 миллион долларлық мыс өнеркәсібі кластері және 60 миллион долларлық оптикалық талшықты кабель өндіретін кәсіпорын салынады.
Әл-Хорезми қалашығында 5 мың студентке арналған заманауи университет, қонақүй, демалыс және сауда кешендері, ал Үргеніш қаласында «Инвесторлар үйі» салынады.
Жалпы, аталған жобаларды жүзеге асыру нәтижесінде 6,6 мың жаңа жұмыс орны ашылады деп жоспарланып отыр.
Мемлекет басшысы осы жобаларды жүзеге асыруға атсалысып жатқан шетелдік серіктестер мен қоғам өкілдеріне алғыс білдірді.
Президент символдық түймені басып, жаңа жобаларды іске қосты және құрылыс жұмыстарын бастап берді. Инвесторлар және белсенді азаматтармен шынайы пікір алмасу өтті.
