Ҳужжатга мувофиқ, маҳаллий ижро этувчи ҳокимият органлари раҳбарлари ўз ҳисобот ва ахборотларини белгиланган муддатларда маҳаллий Кенгашларга шахсан тақдим этиши шарт бўлади.
Шунингдек, ҳар чоракда камида бир марта Кенгаш сессияси кун тартибидаги биринчи масала сифатида, қоида тариқасида, ҳоким ва унинг ўринбосарлари иштирокида сайлов округларидаги муаммолар аҳоли эҳтиёжларидан келиб чиқиб муҳокама қилинади.
Фармон билан депутатларнинг бюджет ташаббусларига ҳам кенгроқ имконият яратилмоқда. Хусусан, 2028 йил учун маҳаллий бюджет лойиҳасини шакллантиришда бюджет харажатларининг 3 фоиздан 5 фоизгача бўлган қисми ҳудуд тоифасидан келиб чиқиб, бевосита депутатлар ташаббуси асосида йўналтирилади. Бунда депутатларнинг бюджет ташаббуслари келгуси йил учун бюджет сўровини шакллантириш муддатидан камида бир ой олдин тайёрланади.
Янги тартибларга кўра, 2026 йил 1 декабрдан бошлаб халқ депутатлари туман ва шаҳар Кенгашлари томонидан қабул қилинадиган ҳужжатлар лойиҳалари юридик хизмат кўрсатиш марказлари томонидан ҳуқуқий экспертизадан ўтказилади.
2027 йил 1 январдан эса Қорақалпоғистон Республикаси Жўқорғи Кенгеси, вилоятлар ва Тошкент шаҳри маҳаллий Кенгашлари сессияларида фуқароларнинг кузатувчи сифатида иштирок этиш амалиёти жорий қилинади. Бунда улар сессия ишига аралашиш ҳуқуқига эга бўлмайди.
Бундан ташқари, маҳаллий Кенгаш депутатларининг тегишли вилоят, туман ёки шаҳар ҳудудида жойлашган корхона, муассаса ва ташкилотларга монеликсиз кириш ҳуқуқи уларнинг депутатлик даражасидан келиб чиқиб белгиланди.
Яна бир муҳим янгилик — маҳаллий Кенгашларга уларнинг қарорларида белгиланган вазифаларни ўз вақтида бажармаган ёки белгиланган тартибда ҳисобот тақдим этмаган мансабдор шахсларга нисбатан юқори турувчи органларга тақдимнома киритиш ваколати берилди. Ушбу тақдимномалар мансабдор шахснинг лавозимига лойиқлигини ёки уни интизомий жавобгарликка тортиш масаласини кўриб чиқишга қаратилган бўлади.
Фармон маҳаллий вакиллик органларининг назорат функцияларини кучайтириш, депутатларнинг ҳудудий муаммоларни ҳал этишдаги иштирокини кенгайтириш ҳамда маҳаллий бошқарувда очиқлик ва масъулиятни оширишга қаратилган.