«Хавфсиз ва соғлом юрт» тезкор профилактик тадбирлари давомида Самарқанд, Хоразм ва Қашқадарё вилоятларида шундай ҳолатлар аниқланди.
Самарқанд вилоятида Давлат хавфсизлик хизмати бошқармаси, божхона ва Миллий гвардия ходимлари ҳамкорлигида ўтказилган тезкор тадбирда Ургут туманида яшовчи, 1987 ва 1994 йилларда туғилган икки шахс ушланган.
Улар 1 килограмм 950 грамм опийни 36 минг АҚШ долларига сотаётган вақтда қўлга олинган. Маълум қилинишича, наркотик модда мамлакатга контрабанда йўли билан олиб кирилган.
Хоразм вилоятидаги тадбирда 1999 йилда туғилган шахс Урганч туманида вақтинча яшаб турган хонадондан чиқаётганида тўхтатилган. Шу пайтда унинг таниши бўлган аёл хонадон деразасидан целлофан пакетни ташқарига улоқтирган.
Пакет текширилганда, ундан 715 грамм гашиш, 0,92 грамм мефедрон ҳамда прегабалин моддаси бўлган «PGN 300» номли 23 дона дори воситаси топилган.
Қашқадарё вилоятида эса «Умакай» йўл-патруль хизмати масканида Сурхондарёдан Тошкентга ҳаракатланаётган «Cobalt» автомобили тўхтатилган. Текширув давомида йўловчи сифатида кетаётган, Денов туманида яшовчи 1996 йилда туғилган шахснинг ёнидан 327 грамм опий ва 127 грамм гашиш аниқланган.
Маълумотларга кўра, ушбу наркотик моддалар аввал Тожикистондан контрабанда йўли билан олиб кирилган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.