Ўтаётган ҳар бир кун бизни мамлакатимиз ҳаётидаги қутлуғ ва муҳим воқеа — Мустақиллик байрами сари яқинлаштиряпти. Давлатимиз раҳбари апрелнинг дастлабки кунида имзолаган “Ўзбекистон Республикаси давлат мустақиллигининг 35 йиллигини кенг нишонлашга тайёргарлик кўриш ва уни ўтказиш тўғрисида”ги қарорда назарда тутилган мақсад ва вазифалар қутлуғ кун моҳиятини янада теран ҳис этишимизга хизмат қилади. “Ягона Ватан, ягона халқ бўлиб, янги ҳаёт ва келажак яратамиз!” деган бош ғоя эса юртимиздаги туб ислоҳотлар, маънавий юксалиш ва миллий тикланиш жараёнларини қалбан англашимизга ёрдам беради.

Қарордаги мақсад ва вазифалар аҳоли фаровонлигини янада ошириш, иқтисодий-ижтимоий ислоҳотларни чуқурлаштириш, маънавий-маърифий ишларни ривожлантириш каби йўналишларни янги босқичга олиб чиқишга қаратилган. Миллий истиқлолимизнинг давлатчилигимиз тарихи, ҳозирги ва келажак ҳаётимиз учун беқиёс аҳамиятини ҳисобга олиб, халқимиз катта тантана билан нишонлайдиган байрамни янги Ўзбекистоннинг бугунги улкан салоҳияти ва жаҳон майдонидаги нуфузига мувофиқ юксак даражада, муносиб нишонлашга доир топшириқлар белгиланган.

2

Буюк Амир Темурнинг шонли ва шукуҳли фаолияти, у асос солган қудратли салтанатнинг оламшумул ютуқлари, давлат бошқарувидаги тадбирли ва қатъиятли сиёсати, асрларга бўйлаган бунёдкорлик ишлари ўзбек миллати қадр-қимматини жаҳон тамаддуни саҳнида юксак мавқега олиб чиққан.

Президентимиз 9 апрель куни Тошкент шаҳридаги Амир Темур хиёбонига ташриф буюриб, улуғ ватандошимиз, машҳур давлат арбоби, енгилмас саркарда, илм-фан, маданият ва санъат ҳомийси ҳайкали пойига гулчамбар қўйди.

Халқимиз табаррук заминимиздан шундай улуғ зот етишиб чиққани билан доимо фахрланиб, ғурурланиб яшайди. Айниқса, бугунги янги Ўзбекистон шароитида Амир Темур ва темурийлар тарихи ҳамда меросини чуқур ўрганиш ҳар қачонгидан ҳам катта аҳамият касб этмоқда. Бу шонли сулола даврида яратилган темурийлар Ренессанси мамлакатимизда янги Уйғониш даври пойдеворини яратишда халқимиз учун ишонч, илҳом ва куч-қудрат манбаи бўлиб хизмат қилмоқда.

Давлатимиз раҳбари шу куни янгидан реконструкция қилинган Темурийлар тарихи давлат музейига ҳам ташриф буюрди. Улуғ зот таваллудининг 690 йиллигини кенг нишонлаш мақсадида жорий йил 5 февраль куни Президентимизнинг тегишли қарори қабул қилинган эди. Унга кўра, ҳар йили апрель ойи “Амир Темур ойлиги” деб эълон қилиниб, таълим муассасалари, илмий марказлар ва маҳаллаларда темуршунос олимлар, ёзувчи ва санъаткорлар иштирокида учрашувлар, давра суҳбатлари ва маърифий тадбирлар ўтказилади.

Президентимиз музейнинг янгиланган экспозицияси ва ташриф буюрувчилар учун яратилган шароитлар билан танишар экан, аждодлар меросини ўрганиш, асраб-авайлаш ва тарғиб этиш нақадар муҳим эканига урғу берди.

— Дунё ҳавас қилгулик тарихимиз, меросимиз бор. Соҳибқирон тарихини жамлаган музей замонга муносиб янги қиёфага келгани яхши бўлди. Энди буни аҳолимизга, ёшларга, хорижлик меҳмонларга етказиш энг катта вазифамиз. Янги Ўзбекистонни юксалтириш учун керакли билимларни қаердан олиш мумкин десангиз, буларнинг барчаси — аждодларимиз қолдирган меросда, илмда. Шу боис, ёшларимизни, нуронийларни, умуман, аҳолимизни маҳаллабай тарзда музейларга олиб келиб, буюк тарихимиз ҳақидаги билимларини оширишимиз лозим, — деди давлатимиз раҳбари.

Сана муносабати билан пойтахтимизда “Амир Темур ва темурийлар тамаддунининг жаҳон тарихи ва маданиятидаги ўрни ва аҳамияти” мавзусида халқаро илмий конференция бўлиб ўтди. Президентимиз нуфузли анжуман иштирокчиларига табрик йўллади.

3

Ўзбекистон Президенти Шавкат ­Мирзиёев Қозоғистон Президенти Қосим-Жомарт ­Тоқаев таклифига биноан 21-22 апрель кунлари амалий ташриф билан Остона шаҳрида бўлиб, Минтақавий экологик саммит ва Оролни қутқариш халқаро жамғармаси таъсисчи давлатлари раҳбарлари кенгашининг йиғилишида иштирок этди.

Дастлаб давлатимиз раҳбари Минтақавий экологик саммитнинг очилиш маросимида нутқ сўзлади. Марказий Осиёдаги иқлим ва экология муаммоларини ҳал қилиш бўйича қатор ташаббусларни илгари сурди. Атмосфера ҳавоси сифати ёмонлашаётган шароитда “Марказий Осиёнинг тоза ҳавоси” давлатлараро консорциумини таъсис этиш таклифи билдирилди.

Президентимиз Тошкентдаги Яшил университет ҳузурида фаолият юритаётган Чўлланишга қарши курашиш, қурғоқчиликнинг олдини олиш ҳамда қум ва чанг бўронлари ҳақида барвақт огоҳлантириш марказига минтақавий мақом бериш муҳимлигини таъкидлади. Технологик ўтиш жараёнларини тезлаштириш учун имтиёзли божхона тартиблари ва экомаҳсулотлар учун сертификатларни ўзаро тан олишни назарда тутувчи “Марказий Осиё яшил савдо йўлаги”ни шакллантириш ташаббуси илгари сурилди.

Ёшлар орасида иқлим кун тартиби ва экологик маданиятни илгари суриш учун 2027 йилда Ўзбекистонда Бутунжаҳон ёшлар иқлим форумини ўтказишга тайёрлик билдирилди.

Сўнг Ўзбекистон Республикаси Президенти Оролни қутқариш халқаро жамғармаси (ОҚХЖ) таъсисчи давлатлари раҳбарлари кенгашининг навбатдаги йиғилишида иштирок этди ва нутқ сўзлади. Мамлакатимиз етакчиси Оролни қутқариш халқаро жамғармаси ноёб минтақавий тузилма сифатида фаолият юритиб келаётгани, Марказий Осиёда сув тақчиллигининг кучайишига сабаб ­бўлаётган иқлим ўзгаришлари ва сув истеъмоли кўпайиб бораётган шароитда унинг роли ва аҳамияти янада ортаётганини таъкидлади.

Тадбир якунида етакчилар Остона баёнотини, Қозоғистон раислигининг бориши тўғрисида, 26 мартни Халқаро Орол денгизи, Амударё ҳамда Сирдарё куни деб эълон қилиш тўғрисида ҳамда Ўзбекистон етакчисини 2027-2029 йилларда жамғарма президенти этиб сайлаш тўғрисидаги қарорларни имзоладилар.

4

Экология, маданият, туризм ва спорт. Бу апрель ойида кун тартибига энг кўп чиққан мавзулар дейиш мумкин. Бир-бирини тўлдирувчи бу тўрт йўналиш ҳар доимгидек йилнинг тўртинчи ойида ҳам давлатимиз раҳбарининг эътибори марказида бўлди.

Президентимиз 1 апрель куни “Яшил макон” умуммиллий лойиҳаси доирасида кўчат экиш тадбирида иштирок этиб, 108 гектар майдонда Миллий дендрология боғини барпо этишга старт берди. Иштирокчилар билан бирга боғнинг илк 5 гектарида манзарали кўчатлар экди.

Кенг жамоатчилик вакиллари билан мулоқот чоғида маҳалла раислари, отахон ва онахонларимиз, хотин-қизлар вакиллари ҳамда барча фаолларни жойларда миллий урф-одатлар, анъана ва қадриятларни янада кенг тарғиб қилиш, клублар ва жамоалар ташкил этиб, ҳар бир кўча, хонадон, йўл бўйларига ниҳол ва гуллар, қир-адирларга дарахт ва буталар экишда бош бўлишга чақирди.

Шу куни Президентимиз мамлакатимизда ташриф билан бўлиб турган БMT Туризм бош котиби Шайха Носир ан-Новайсни қабул қилди. Ўзбекистон ва БМТнинг ушбу ихтисослашган муассасаси ўртасидаги кўп қиррали ва узоқ муддатли ҳамкорликни янада кенгайтириш масалалари кўриб чиқилди.

Президентимиз раислигида 7 апрель куни жисмоний тарбия ва спорт соҳасини янги босқичга олиб чиқиш, аҳолини оммавий спортга кенг жалб этиш, селекция ва тайёргарлик тизимини такомиллаштириш масалалари юзасидан видеоселектор йиғилиши бўлиб ўтди.

Давлатимиз раҳбари 15 апрель — Маданият ва санъат ходимлари куни муносабати билан соҳа вакилларига табрик йўллади. Шу куни Кўксарой қароргоҳида мамлакатимиз етакчиси иштирокида миллий эстрада санъати ёрқин намояндаси, Ўзбекистон халқ артисти Фаррух Зокиров таваллудининг 80 йиллиги муносабати билан тантанали тадбир бўлиб ўтди. Мамлакатимиз етакчиси Фаррух Зокировни ушбу қутлуғ сана билан самимий қутлади.

Тантанада Фаррух Зокировнинг кўп йиллик самарали меҳнати, миллий маданиятимиз ва санъатимизни ривожлантириш йўлидаги фидокорона хизматларини муносиб тақдирлаш мақсадида давлатимиз раҳбарининг санъаткорни “Буюк хизматлари учун” ордени билан мукофотлаш ҳақидаги фармони ва “Ўзбекистон Республикаси халқ артисти Фаррух Зокиров ижодини кенг тарғиб қилиш ҳамда ёш авлодга муносиб етказиш тўғрисида”ги қарори имзолангани эълон қилинди.

16 апрель куни давлатимиз раҳбари маданият ва туризм соҳасидаги ишлар ва янги лойиҳалар тақдимоти билан танишди. Самарқанд шаҳрида 9 гектар майдонда янги Ипак йўли музейини барпо этиш режаси кўриб чиқилди. Тақдимотда аҳолини маданият муассасаларига кенг жалб қилиш, уларнинг мазмун-моҳияти ва иш услубини замон талаблари асосида янгилаш масалаларига ҳам алоҳида эътибор қаратилди.

Президентимиз Халқаро шахмат федерациясининг Номзодлар турнири ғолиби Жавоҳир Синдоров билан телефон орқали мулоқот қилди. Ёш гроссмейстеримизни Ўзбекистон шахмати тарихида биринчи марта мазкур нуфузли мусобақада зафар қозониб, том маънодаги тарихий ғалабага эришгани билан самимий табриклади. Энди шахматчимиз ­олдида жаҳон тожи учун ҳал қилувчи ва шарафли беллашув турганини қайд этиб, бўлажак ўйинларда янада улкан омад, куч-ғайрат ва янги зафарлар тилади.

17 апрель куни Тошкентга етиб келган Жавоҳир Синдоров шарафига тантанали маросим бўлиб ўтди. Давлатимиз раҳбари маросимда сўзга чиқиб, ёш шахматчини мазкур тарихий зафар билан яна бир бор самимий қутлади. Бу бутун халқимиз, янги ­Ўзбекистоннинг ғалабаси эканини таъкидлади. Мамлакатимизда шахматни кенг оммалаштириш, айниқса, ёшлар ўртасида ушбу спорт турини тарғиб этиш, навқирон авлод қалбида миллий ғурур, Ватанга муҳаббат ва садоқат туйғуларини камол топтириш борасидаги катта хизматлари, шунингдек, Кипрда ўтказилган FIDE Номзодлар турнирида рекорд натижалар кўрсатиб, муддатидан олдин ғолибликни қўлга киритгани учун Жавоҳир Синдоровни Президентимизнинг “Меҳнат шуҳрати” ­ордени билан мукофотлаш тўғрисидаги фармони ўқиб эшиттирилди.

Давлатимиз раҳбари ёшлар ўртасидаги жаҳон чемпионати доирасида мамлакатимизда бўлиб турган Бутунжаҳон таэквондо федерацияси президенти Чо Чунг Вонни қабул қилди. Мулоқот чоғида ҳамкорликнинг янги истиқболлари муҳокама қилинди.

27 апрелда кўҳна Хива шаҳрида мусиқа ва санъат байрами — “Лазги” III халқаро рақс фестивалининг очилиш маросими бўлиб ўтди. Президентимиз санъат анжумани иштирокчиларига табрик йўллаб, уларни чин қалбдан муборакбод этди.

Ойнинг сўнгги саналари — 29 апрелда гидроэнергетика соҳасини янада ривожлантириш чора-тадбирлари, 30 апрель куни эса табиатни муҳофаза қилиш, экологик барқарорликни таъминлаш, чиқиндиларни бошқариш тизимини такомиллаштириш ҳамда муҳофаза этиладиган табиий ҳудудларни ривожлантириш бўйича таклифлар тақдимоти бўлиб ўтди.

5

Президентимиз 2 апрель куни Бухоро, 8 апрелда эса Тошкент вилоятидаги ислоҳотлар натижадорлиги, ҳудудларнинг иқтисодий салоҳиятидан самарали фойдаланиш ва келгусидаги устувор вазифалар юзасидан йиғилиш ўтказди. Шунингдек, 9 апрель куни бўлиб ўтган йиғилиш кун тартибидан Фарғона вилоятининг Сўх туманини ижтимоий-иқтисодий ривожлантириш чора-тадбирлари масаласи ўрин олди. 16 апрель куни Тошкент шаҳри иқтисодиётида юқори ўсиш суръатини таъминлаш, мавжуд захираларни тўлиқ ишга солиш ҳамда тадбиркорлик фаолияти учун янада қулай шароитлар яратиш масалалари кўриб чиқилди.

Давлатимиз раҳбари 10 апрель куни Бухоро шаҳрига ташриф буюриб, дастлаб вилоятнинг янги маъмурий марказидаги бунёдкорлик ишлари билан танишди. Сўнг Бухоронинг тарихий қисмига ташриф буюрди, шаҳар аҳолиси ва меҳмонлари билан мулоқот қилди. Давлатимиз раҳбарига вилоятнинг иқтисодий, инвестициявий ва туризм салоҳиятини оширишга қаратилган бошқа қурилиш лойиҳалари ҳақида ҳам ахборот берилди.

Мамлакатимиз етакчиси таклифига биноан Қозоғистон Президенти Қосим-Жомарт Тоқаев амалий ташриф билан Ўзбекистонга келди. Олий мартабали меҳмонни Бухоро халқаро аэропортида давлатимиз раҳбари кутиб олди. Президентлар биргаликда Баҳоуддин Нақшбанд мақбарасини зиёрат қилди.

Бухоро шаҳрида бўлиб ўтган етакчилар учрашувида мамлакатларимиз ўртасида дўстлик, стратегик шериклик ва иттифоқчилик муносабатларини янада ривожлантириш ҳамда мустаҳкамлашнинг долзарб масалалари кўриб чиқилди.

Президентимиз 23 апрель куни Тошкент шаҳри Мирзо Улуғбек тумани ҳокимлигига ташриф буюрди. Дастлаб ҳокимлик биноси ёнидаги Салар канали устида қурилган кўприкни, ҳудуддаги кўкаламзорлаштириш ишларини кўздан кечирди ва шу ерда кўчат экди.

Ҳокимликда вазиятлар маркази ташкил этилиб, сунъий интеллект асосида таҳлил қилиш, муаммоларни тезкор аниқлаш ва ҳал этиш бўйича “Ақлли туман” платформаси ишлаб чиқилган. Президентимиз вазиятлар маркази фаолияти билан танишиб, ушбу янги тизимни пойтахтнинг қолган туманларида ҳам жорий этишга топшириқ берди.

Давлатимиз раҳбари тумандаги Ўзбекистон овози кўчасида ташкил этилган гастрономик туризм кўчаси фаолияти билан ҳам танишди. Замонавий услубда таъмирланган хонадонлар, обод кўчалар ва аҳоли учун яратилган шароитларни кўздан кечирди. Шунингдек, Мирзо Улуғбек туманида янги бунёд этилган “Pavilion” савдо мажмуаси фаолияти ва имкониятлари билан танишиб, мажмуа қурилиш материаллари бозорида янги маданият, янги сифат ва янги хизмат стандартларини шакллантирадиган маскан бўлиши кераклигини таъкидлади.

Президентимизнинг апрель ойида навбатдаги ташриф манзили гўзал Фарғона бўлди. Бу ерда барпо этилаётган янги турар жойлар, тадбиркорлик, чорвачилик, қишлоқ хўжалиги, саноат тармоқларига инвесторларни жалб этиш йўлида амалга оширилаётган лойиҳалар кўламини юртимизда кечаётган ислоҳотларнинг ҳудуддаги кўзгуси дейиш мумкин.

Мамлакатимиз етакчиси фарғоналикларнинг барча ислоҳотларнинг олдинги сафида бўлишига ишонч билдирди. Буни водий аҳли кўтаринки кайфиятда қабул қилди. Икки кунлик ташриф Қўқон шаҳридаги “Янги Ўзбекистон” массивида бажарилаётган бунёдкорлик ишлари билан танишувдан бошланди. Қадимий масканда қад ростлаётган янги массив нафақат уй-жой мажмуаси, балки ҳудуднинг иқтисодий ва ижтимоий қиёфасини ўзгартирувчи замонавий марказ сифатида шаклланмоқда.

Фарғона водийсида Қўқон, Наманган, Андижон ва Марғилон шаҳарларини боғловчи янги электропоезд қатнови йўлга қўйилди. Президентимиз жамоатчилик вакиллари билан бирга ушбу йўналишдаги илк поездда Қўқондан Марғилон шаҳрига келди. Марғилон шаҳрида “Бурҳониддин Марғиноний” илмий-маърифий ва туризм мажмуасининг тантанали очилиш маросими бўлиб ўтди.

— Биз ушбу мажмуани айнан Марғилон шаҳрида барпо этганимиз замирида жуда чуқур тарихий ва ҳаётий ҳақиқат мужассам. Бу табаррук шаҳар кўплаб илм ва маърифат эгаларини вояга етказган. Тарихий манбаларда айтилишича, мазкур қутлуғ маскан “Маърифат аҳлининг ватани” деган юксак шарафга сазовор бўлган. Биз ана шундай қудратли маънавий меросимизга таяниб, Марғилон, бутун Фарғона тарихининг шон-шараф китобига янги саҳифалар битмоқдамиз. Бу билан ҳар қанча фахрлансак, ғурурлансак арзийди, — деди давлатимиз раҳбари.

28 апрель — ташрифнинг иккинчи куни Президентимиз иштирокида Фарғона вилоятини ижтимоий-иқтисодий ривожлантириш масалалари юзасидан йиғилиш ўтказилди.

6

Умуман, Президентимиз апрель ойида йигирмадан ортиқ тақдимот ва ҳисоботлар билан танишди. Хусусан, олий таълим, фан ва инновациялар тизимини янада такомиллаштириш, тўловга қобилиятсизлик институтини такомиллаштириш ва молиявий аҳволи оғир тадбиркорлик субъектларини соғломлаштириш бўйича янги ёндашувлар, солиқ маъмурчилигини такомиллаштириш ва солиқ органлари фаолиятини ислоҳ қилишга доир тақдимотлар ўтказилди.

Бундан ташқари, иқтисодиётда давлат иштирокини қисқартириш ва хусусийлаштириш жараёнларини жадаллаштириш, жамоат хавфсизлигини таъминлаш тизимини янада такомиллаштириш, электрон тижоратни ривожлантириш ва бонд омборлар фаолиятини йўлга қўйишга қаратилган таклифлар тақдимот қилинди.

“Янги Ўзбекистон ёшлари — 2030” стратегияси лойиҳаси, ташқи меҳнат миграциясини тартибли ташкил этиш, фуқароларни хориждаги юқори даромадли иш ўринларига тайёрлаш ва уларни ҳар томонлама ҳимоя қилишга қаратилган чора-тадбирлар, ер ресурсларидан янада самарали фойдаланишга қаратилган таклифлар ҳам тақдимотлар мавзусини қамраб олди.

Видеоселектор йиғилишларида эса уй-жой қурилиши ва урбанизация соҳасида бажарилаётган ишлар, мавжуд муаммолар ва келгусидаги устувор вазифалар белгилаб олинган бўлса, мутасаддилар нефть-газ тармоғида барқарор ишлаб чиқариш кўрсаткичларини таъминлаш ва молиявий-иқтисодий самарадорликни ошириш бўйича кўрилаётган чора-тадбирлар, шунингдек, ҳарбий хизматчиларни ижтимоий қўллаб-қувватлаш, резерв ва захирадаги офицерлар тайёрлаш тизимини такомиллаштириш, 9 май — Хотира ва қадрлаш кунига тайёргарлик кўриш юзасидан давлатимиз раҳбарига ахборот берди.

Президентимизнинг 7 апрель куни Россия Федерацияси Федерал Мажлиси Федерация Кенгаши Раиси Валентина Матвиенко билан телефон орқали мулоқоти бўлиб ўтди. 15 апрель куни Россия Федерацияси Президенти Администрацияси раҳбарининг биринчи ўринбосари Сергей Кириенко бошчилигидаги делегацияни, 20 апрель куни ­“ИННОПРОМ. Марказий Осиё” халқаро саноат кўргазмасида мамлакат делегациясига бошчилик қилаётган Россия Федерацияси Ҳукумати Раисининг биринчи ўринбосари Денис Мантуровни қабул қилди.

Бундан ташқари, апрель ойида мамлакатимиз уй-жой коммунал хизмат кўрсатиш соҳаси ҳамда геология соҳаси ходимлари касб байрамини нишонлади. Давлатимиз раҳбари уларга табрик йўллади. Шунингдек, Самарқандда бўлиб ўтган “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги халқаро форум иштирокчиларини қутлади.

7

Давлатимиз раҳбари раислигида 24 апрель куни ўтказилган видеоселектор йиғилиши мамлакат иқтисодиётидаги ҳозирги ҳолат ва устувор йўналишларни аниқ белгилаб бергани билан янада аҳамиятли бўлди. Унда жорий йил биринчи чорак якунлари таҳлил қилинди, ҳудудлар ва тармоқлар кесимидаги кўрсаткичлар ўзаро боғлиқ ҳолда кўриб чиқилди, йил якунигача амалга оширилиши лозим бўлган вазифалар белгилаб олинди.

Жумладан, келаси ой 2 миллиард 400 миллион долларлик давлат активларининг 30 фоизи илк бор халқаро фонд бозорларига чиқарилиши қайд этилди. Бу Миллий инвестиция жамғармаси ташкил этилиб, 13 та стратегик корхона бошқаруви нуфузли “Franklin Templeton” компаниясига берилгани билан боғлиқ.

Мамлакатимиз етакчиси барча даражадаги раҳбарлар бугунги мураккаб вазиятда натижа учун шахсан масъул эканини таъкидлади. Иқтисодий ўсишни таъминлаш, ­инфляцияни жиловлаш, иш ўринлари яратиш, экспортни кўпайтириш, инвестиция сифати ва тадбиркорлар муаммоларини ҳал қилиш ҳар бир раҳбар фаолиятининг асосий мезони бўлиши белгиланди.

8

Чехия Республикаси Бош вазири Андрей Бабиш 29-30 апрель кунлари расмий ташриф билан мамлакатимизда бўлди. Кўксарой қароргоҳида тантанали кутиб олиш маросимидан сўнг Ўзбекистон Президенти ва Чехия Республикаси Бош вазирининг тор доирада ва икки мамлакат делегациялари иштирокида музокаралари ўтказилди.

Ўзбекистон билан Чехия ўртасидаги амалий ҳамкорликнинг жорий ҳолати ва уни янада ривожлантириш истиқболлари муҳокама қилинди. Учрашув аввалида мамлакатимиз етакчиси ушбу ташриф Ўзбекистон — Чехия муносабатлари тарихида сифат жиҳатидан янги босқични бошлаб беришини алоҳида таъкидлади. Барча соҳада ҳамкорлик жадал ривожланиб бораётгани мамнуният билан қайд этилди.

Ўзаро савдо ҳажмини оширишга алоҳида эътибор қаратилди. Товар айирбошлашни, шу жумладан, маҳсулот турларини кенгайтириш орқали 1 миллиард долларга етказиш вазифаси қўйилди.

Музокаралар якунида Ўзбекистон Республикаси Президенти Шавкат Мирзиёев ва ­Чехия Республикаси Бош вазири Андрей Бабиш Кенгайтирилган ҳамкорликни илгари суриш тўғрисида қўшма декларацияни имзоладилар.

Нодир МАҲМУДОВ,

“Янги Ўзбекистон” мухбири