Андижон вилояти божхона бошқармасининг Контрабандага қарши курашиш бўлими ходимлари Божхона қўмитасининг Таргетлаш ва хавфларни мониторинг қилиш бошқармаси, вилоят Давлат хавфсизлик хизмати ҳамда Ички ишлар ходимлари билан ҳамкорликда гиёҳвандлик воситаларининг ноқонуний айланмасига қарши тезкор тадбир ўтказишди.
Андижон шахридаги қўшариқ дахасида ўтказилган тезкор тадбирда олдиндан шубҳа остига олинган фуқаро бошқарувидаги “Матиз” русумли автотранспорт воситаси тўхтатилиб, холислар иштирокида кўздан кечирилди.
Натижада ушбу шахснинг чўнтагида 3 дона ўрамда, шунингдек, ушбу автотранспорт воситасида йўловчи сифатида кетаётган 40 ёшли шахснинг ёнидан эса 1 дона ўрамда “гашиш” гиёхвандлик моддаси топилди.
Шундан сўнг ушбу шахслардан бирининг Андижон туманидаги хонадони белгиланган тартибда кўздан кечирилганида, ҳовлидаги товуқ катаги устида ҳам 5 дона “гашиш” гиёҳвандлик моддаси яшириб қўйилганлиги фош қилинди.
Ўтказилган тезкор тадбир натижасида умумий оғирлиги 377 гр. “гашиш” ашёвий далил сифатида олиб қўйилди ва ҳолат юзасидан божхона органлари томонидан жиноят иши қўзғатилди.
