Вилоят ҳокими Шуҳратбек Абдураҳмонов «Сарвонтепа», «Фаробий», «Мустақилликнинг 21 йиллиги», «Ҳамдўстлик» ва «Узумзор» маҳаллаларида амалга оширилаётган лойиҳа тақдимоти билан танишди.
Лойиҳани сифатли амалга ошириш мақсадида 500 нафардан ортиқ соҳа мутахассиси иштирокида ҳудуд тўлиқ ўрганилди. Муҳандислик таҳлиллари асосида ягона қурилиш лойиҳаси ишлаб чиқилди.
Айни пайтда қурилиш-монтаж ишларига 50 дан ортиқ замонавий махсус техника жалб қилинган бўлиб, ишлар жадал суръатларда олиб борилмоқда. Лойиҳанинг амалга оширилиши маҳаллалар муҳандислик инфратузилмасини яхшилаш ва аҳоли турмуш шароитини оширишга хизмат қилиши кутилмоқда.
Шунингдек, Андижонда оқова сув тизимларини қуриш ва реконструкция қилиш ишлари ҳам бошланди. Саида Мирзиёеванинг вилоятга ташрифи давомида кўтарилган сув таъминоти, оқова тизимлари ва йўл инфратузилмасига оид масалалар юзасидан тезкор чоралар кўрилди.
Хусусан, Бобуршоҳ ва Олтинкўл кўчаларидаги объектларда қурилиш ишларини амалга ошириш учун 98,9 миллиард сўм маблағ ажратилди. Лойиҳани бажаришга 60 дан ортиқ йирик махсус техника ва механизмлар жалб этилган.
Масъуллар таъкидлашича, ушбу лойиҳалар аҳоли учун муносиб яшаш шароитларини яратиш, муҳандислик-коммуникация тармоқларини янгилаш ҳамда ҳудудларни комплекс ривожлантиришга хизмат қилади.
