Мазкур қурилма реал вақт режимида мия фаоллигини кузатиб боради, диққатнинг йўқолишини сезганда ишдан танаффус қилишни таклиф қилади. У ташқи кўринишидан гаджет шовқинни пасайтирувчи оддий аудиотехникадан фарқ қилмайди, дея хабар беради science.mail.ru.
***
Американинг Neurable компанияси диққатни жамлаш ва ақлий чарчоқни кузатиш учун ўрнатилган сенсорларга эга Neurable One симсиз қулоқчинларини тақдим этди. Қурилма миянинг электр фаоллигини реал вақт режимида кўрсатмаларга айлантиради.
Ташқи кўринишидан бу модель шовқинни фаол пасайтирадиган қулоқчинларни эслатади. Аммо унинг асосий хусусияти қулоқчин ичкарисида яширинган. Унинг ҳар бир томнида 6 тадан қуруқ электроэнцефалография (ЭЭГ) датчиги мавжуд ташқаридан мутлақо кўринмайди.
Сенсорлар 125 Гс частотали ва 16 бит аниқликдаги сигналларни қайд этади. Махсус алгоритмлар юриш, жағ ҳаракатлари, ижро этилаётган мусиқа ва шовқинни камайтириш тизимидан келиб чиқадиган маиший тўсиқларни бартараф этади. Ишлаб чиқувчиларнинг таъкидлашича, технология фақат умумий фаолият намуналарини ўқийди ва инсоннинг фикрлари, сўзлари, визуал тасвирлари ёки ҳис-туйғуларини ўқий олмайди.
Қулоқчиндаги сенсорлар қандай ишлайди?
Йиғилган маълумотлар iOS ва Android иловаларига узатилади, бу эса биологик тескари алоқа ҳалқасини яратади. Компьютерда ишлаётганда дастур жорий диққатни жамлаш даражасини кўрсатади, диққат йўқолганда товуш фонини бироз ўзгартиради. Чарчоқ аломатларини аниқлаганда беш дақиқалик танаффус қилишни, масалан, совуқ сув билан ювинишни таклиф қилади.
Умуман олганда, тизим саккизта кўрсаткични, жумладан, диққатни жамлаш, когнитив юклама, уйқучанлик, альфа-ритмнинг энг юқори частотаси ва шартли “мия батареяси қуввати”ни кузатиб боради. Барча кўрсаткичлар бошқа одамларнинг ўртача кўрсаткичлари билан эмас, балки эгасининг шахсий базавий меъёри билан таққосланади. Бундан ташқари, иккинчи финжон қаҳва, ёмон уйқу ёки қисқа сайр мия фаолиятига қандай таъсир қилганини текшириш учун кўзларни юмган ҳолда бир дақиқалик тестни ишга тушириш мумкин.
Овоз учун 40 миллиметрли бериллий нурлантиргичлар ва ўнта микрофон жавоб беради, Bluetooth эса AAC ва aptX кодекларини қўллаб-қувватлайди. Нейродатчикларсиз аккумулятор 22 соатлик мусиқага етади, ЭЭГнинг фаол назорати билан ишлаш вақти камаяди, аммо USB-C орқали тез зарядлаш бир неча дақиқа ичида бир неча соат ишлаш имконини беради.
Яратувчилар тахминан 500 доллар турадиган гаджет тиббий қурилма эмаслигини ва касалликларни ташхислаш ёки даволаш учун мўлжалланмаганини, мия фаолияти ҳақидаги маълумотлар эса сотилмаслигини ва реклама учун ишлатилмаслигини эслатади.
Мутахассисларнинг фикрича, сезилмас сенсорлар мия ҳолатини кузатишни бугунги кунда ақлли соатларда пульсни ўлчаш каби одатий вазифага айлантириши мумкин.
Илгари симсиз қулоқчинлар дунёни кўриш ва сунъий интеллект билан мулоқот қилишни ўргатган эди.
