Сентябрь ойида Эль-Ниньо фаоллашиб, кузатувлар тарихидаги энг кучли даражага етди. Бу ҳақда Япония метеорология агентлиги маълум қилди. Мутахассисларнинг баҳолашича, ушбу иқлим ҳодисаси бутун қиш давомида сақланиб қолади, деб ёзади The Independent нашри.
Тинч океани юзасидаги сув ҳарорати одатдаги кўрсаткичдан 4 даражага юқори бўлди. Бу 1949 йилда кузатувлар бошланганидан бери қайд этилган энг юқори кўрсаткичдир.
Синоптиклар бир неча ойдан бери бу йилги Эль-Ниньо кузатувлар тарихидаги энг кучли ҳодисага айланиши мумкинлигидан огоҳлантириб келмоқда. Шу сабабли бу ҳодиса “супер Эль-Ниньо” деб аталмоқда.
Эль-Ниньо — дунё бўйлаб об-ҳавога таъсир кўрсатадиган табиий иқлим циклининг илиқ босқичидир. У глобал ҳароратнинг кўтарилишига ва катта ҳудудларда ёғингарчиликнинг одатий тақсимоти ўзгаришига сабаб бўлади. Айрим жойларда бу қурғоқчиликка, бошқа ҳудудларда эса кучли ёмғирларга олиб келади. Одатда, бу ҳодиса ҳар икки йилдан етти йилгача бўлган оралиқларда такрорланади.
Жаҳон метеорология ташкилоти (ЖМТ) ҳам Эль-Ниньо кучайишда давом этиши ва тахминан декабрь ойида ўзининг энг юқори нуқтасига етишини маълум қилди, деб хабар берди korrespondent.net.
“ЖМТ прогнозларига кўра, ушбу ҳодисанинг 2027 йил февраль ойигача давом этиш эҳтимоли 100 фоизга яқин. У 1950 йилдан бери кузатилган энг кучли ҳодисалардан бирига айланиши мумкин”, — деди ташкилот бош котиби Селесте Сауло.
Чикаго университети маълум қилишича, Эль-Ниньо билан боғлиқ иссиқлик 2026 йил июнь ойидан 2027 йил февраль ойигача бўлган даврда бутун дунё бўйлаб қўшимча 451 минг кишининг ўлимига сабаб бўлиши мумкин.
Тадқиқотчиларнинг баҳолашича, ўта юқори ҳарорат кузатиладиган кунлар сони одатий йилларга нисбатан 44 фоизга ошади.
