«Дунё» ахборот агентлигининг хабар беришича, фонд АҚШда яшаётган ватандошлар ташаббуси билан ташкил этилган. Унинг асосчилари Фарҳод ва Севара Султон ҳамда Америкадаги ўзбек диаспораси вакилларидир.

Лойиҳанинг асосий мақсади Ўзбекистоннинг чекка ҳудудларидаги иқтидорли қизларга инглиз тили ва математика фанларидан бепул таълим бериш, уларни олий таълим муассасаларига киришга тайёрлаш ва келгусида касбий ривожланишига кўмаклашишдан иборат.

Фонд ҳаммуассиси Севара Султоннинг маълум қилишича, ёзда эълон қилинган биринчи танловда мамлакатнинг турли ҳудудларидан 236 та ариза келиб тушган. Иншо ёзиш ва суҳбат босқичларидан иборат саралаш натижасида 10 та ҳудуддан 20 нафар қиз дастурнинг илк иштирокчилари сифатида танлаб олинган.

Ҳозирда улар Ўзбекистондаги ҳамкор ўқув маркази томонидан ишлаб чиқилган дастур асосида мактаб машғулотларидан ташқари ҳафтасига олти кун онлайн тарзда бепул таълим олмоқда.

Фонд келгусида дастур иштирокчилари сонини 500 нафарга етказиш, уларнинг халқаро таълим дастурларида қатнашиши ва хорижий университетларга ўқишга киришига кўмаклашишни режалаштирган. Очилиш маросимида ҳомийлардан бири дастлабки гуруҳ таълимини молиялаштириш учун маблағ ажратгани ҳам маълум қилинди.

Ташкилот вакиллари лойиҳа қамровини кенгайтириш мақсадида Ўзбекистон Мактабгача ва мактаб таълими вазирлиги, Оила ва хотин-қизлар қўмитаси, ҳокимликлар ҳамда мактаблар билан ҳамкорлик қилишдан манфаатдор.

Маросимда Ўзбекистоннинг АҚШдаги элчиси Фурқат Сидиқов хотин-қизларнинг ҳуқуқларини ҳимоя қилиш, уларнинг таълим олиши ва касбий ривожланиши учун шароит яратиш борасида мамлакатимизда амалга оширилаётган ислоҳотларга тўхталди. У фонд фаолияти ушбу ислоҳотлар мақсадларига мос келишини таъкидлаб, ватандошларнинг ташаббусини юқори баҳолади.

Тадбир якунида бундай лойиҳалар кўламини кенгайтиришда АҚШдаги ўзбек диаспораси салоҳиятидан янада самарали фойдаланиш бўйича фикр алмашилди.