Шунингдек, мамлакатимизда қора металлургия саноатини янада ривожлантириш юзасидан йиғилиш ўтказди.
Бекобод нафақат Тошкент вилояти, балки Ўзбекистон саноатининг йирик таянч нуқталаридан бири. Мамлакатимиз металлургия тармоғининг шаклланиши ва тараққиётида алоҳида ўрин тутадиган стратегик шаҳар. Йиллар давомида ишлаб чиқариш қувватлари, муҳандислик салоҳияти ҳамда малакали кадрлар мактаби билан танилган Бекобод шаҳри бугун мутлақо янги ривожланиш босқичига қадам қўймоқда. 110 минг юртдошимиз истиқомат қилаётган ҳудудда эндиликда саноат корхоналари модернизацияси, янги инвестиция лойиҳалари билан бир қаторда замонавий инфратузилма, қулай транспорт тизими, аҳоли ҳаёт сифатини оширишга қаратилган ечимлар ҳам тараққиётнинг муҳим мезонига айланган.
Айниқса, ҳудудлар ўртасидаги ижтимоий-иқтисодий алоқаларни мустаҳкамлаш, аҳолининг эркин ҳаракатланиши учун замонавий транспорт инфратузилмасини яратиш масаласи доимий диққат марказида. Темир йўл транспортини изчил ривожлантириш, ички йўналишларда қатновлар географиясини кенгайтириш, йўловчилар учун хавфсиз, тезкор ва қулай хизматларни йўлга қўйиш, хусусан, йирик саноат марказларини пойтахт билан замонавий транспорт орқали боғлаш ишлаб чиқариш, таълим ва хизматлар соҳасидаги интеграцияни янада кучайтиришга йўл очмоқда.
Шу маънода, Президентимиз Шавкат Мирзиёевнинг Бекобод шаҳрига Тошкентдан электропоездда етиб келгани алоҳида аҳамият касб этади.
Мазкур йўналишдаги ишлар Президентимизнинг 2025 йил 27 декабрдаги “2030 йилга қадар темир йўл транспортида маҳаллий йўналишларда йўловчи ташиш кўрсаткичларини ошириш чора-тадбирлари тўғрисида”ги қарори асосида изчил амалга оширилмоқда. Ушбу ҳужжатга мувофиқ, ҳудудларда транспорт инфратузилмаси босқичма-босқич янгиланиб, маҳаллий қатновлар кенгайтирилмоқда, ҳаракат таркиблари янгиланяпти.
Бекобод темир йўл вокзалида давлатимиз раҳбарига пойтахт ва мазкур шаҳарни боғловчи янги йўналишда бажарилган ишлар ҳақида ахборот берилди. Узунлиги 192 километр бўлган Тошкент — Бекобод темир йўлида кунига қарийб минг, йилига эса 300 минг йўловчига хизмат кўрсатиш режалаштирилган. Ушбу йўналишда олти вагондан иборат, 586 йўловчини сиғдира оладиган замонавий электропоезд соатига 120 километргача тезликда ҳаракатланади. Бу, айниқса, ҳар куни иш ва ўқиш мақсадида пойтахт ҳамда Бекобод ўртасида қатновчи фуқаролар учун қимматли вақтини тежаш, қўшимча қулайликлардан баҳраманд бўлиш имконияти демакдир.
Янги электропоезд вагонлари кондиционер ва иситиш тизимлари, юмшоқ ўриндиқлар, USB қувватлаш нуқталари, Wi-Fi тармоғи, видеокузатув воситалари ҳамда электрон ахборот таблолари билан жиҳозланган. Ногиронлиги бўлган шахслар учун махсус кўтаргичлар, велосипедларни жойлаштириш имконияти ҳам назарда тутилган. Бу каби ўзига хос ечимлар орқали эса, ўз навбатида, транспорт хизматлари замонавий талаблар даражасига олиб чиқилиб, аҳолининг барча қатламлари учун қулай ва инклюзив муҳит яратиляпти.
Тезкор электропоезднинг қатновга қўйилиши автомобиль йўлларидаги транспорт юкламасини камайтириш, шунингдек, экологик тоза транспорт улушини ошириш йўлидаги муҳим қадамлардан биридир.
Президентимиз ташриф давомида мазкур жиҳатларга тўхталиб, темир йўл инфратузилмасини янада ривожлантириш, йўловчилар учун яратилаётган шароитларни изчил яхшилаш, тармоқларни электрлаштириш ва темир йўлларга туташ ҳудудларни ободонлаштириш юзасидан мутасаддиларга тегишли топшириқлар берди. Вокзал инфратузилмасини такомиллаштириш, хизмат кўрсатиш сифатини ошириш ҳамда йўловчилар ҳаракатини самарали ташкил этиш масалаларига алоҳида эътибор қаратилди.
Шундан сўнг давлатимиз раҳбари Ўзбекистон металлургия комбинатида барпо этилган янги қуюв-прокатлаш мажмуасини ишга тушириш маросимида иштирок этди.
Мамлакатимиз етакчиси тантанали маросимда комбинат жамоаси, меҳнат фахрийлари ҳамда хорижлик ҳамкорларни ушбу муҳим воқеа билан табриклаб, металлургия тармоғини ривожлантириш иқтисодиётимизнинг стратегик йўналишларидан бири эканини алоҳида таъкидлади.
Кейинги йилларда кон-металлургия соҳасини янги технологик босқичга олиб чиқиш мақсадида кенг кўламли ислоҳотлар ўтказилмоқда. Ўтган ўн йил давомида соҳага қарийб 2 миллиард доллар хорижий инвестиция жалб этилиб, 31 та йирик ишлаб чиқариш қуввати ишга туширилди. Хусусий сектор учун яратилган кенг имкониятлар натижасида тармоқда фаолият юритаётган корхоналар сони 150 тадан ошди. Бундай ўзгаришлар ишлаб чиқариш кўрсаткичларида ҳам яққол намоён бўлди. Маҳаллий металл маҳсулотлари ишлаб чиқариш ҳажми йилига 3 миллион тоннага, қиймати эса 23 триллион сўмга етди. Ҳолбуки, 2016 йилда тармоқда 800 минг тонна, қиймати 1,5 триллион сўмлик маҳсулот ишлаб чиқарилган эди.
Металлургия тармоғининг бугунги тараққиёти маҳсулот номенклатураси сезиларли даражада кенгайгани билан ажралиб туради. Илгари асосан қурилиш соҳаси эҳтиёжлари учун металл прокат ишлаб чиқарилган бўлса, бугунги кунда машинасозлик, электротехника, мудофаа саноати ва энергетика каби жадал ривожланаётган йўналишлар учун 80 турдаги янги маҳсулот тайёрланмоқда.
Президентимиз металлурглар меҳнати янги Ўзбекистоннинг замонавий қиёфасини яратиш, йирик бунёдкорлик лойиҳаларини рўёбга чиқариш ва иқтисодиёт тармоқларининг барқарор ривожида муҳим ўрин тутаётганини алоҳида қайд этди.
Давлатимиз олдига қўйилган улкан иқтисодий мақсадлар металлургия саноати зиммасига ҳам янги вазифаларни юкламоқда. Мамлакатимиз иқтисодиётини технологик ва инновацион ўсиш моделига ўтказиш, 2030 йилга бориб, ялпи ички маҳсулот ҳажмини 240 миллиард долларга етказиш, келгуси беш йилда иқтисодиётга 180 миллиард доллар хорижий инвестиция жалб қилиш, 27 миллиард долларлик ижтимоий ва ишлаб чиқариш инфратузилмаси лойиҳаларини амалга ошириш каби улкан бунёдкорлик режалари металл маҳсулотларига талабни бугунгидагига нисбатан 1,5 баробар оширади. Шу боис, 5,5 мингдан зиёд фидойи меҳнат жамоасига эга Ўзбекистон металлургия комбинатининг ўрни ва масъулияти янада ортмоқда.
Янги қуюв-прокатлаш мажмуаси ана шу истиқболли вазифаларни бажаришда муҳим таянч бўлади. Энергиятежамкор технология ва замонавий рақамли ечимлар асосида бунёд этилган мажмуа меҳнат унумдорлигини ва маҳсулот сифатини ошириш ҳамда ишлаб чиқариш самарадорлигини таъминлашда янги босқични бошлаб беради. Энг муҳими, лойиҳа юртимиз тарихида иссиқ прокатланган пўлат листлар ишлаб чиқаришга ихтисослашган биринчи мажмуадир. Унинг ишга туширилиши натижасида йилига 8 триллион сўмлик 1 миллион тонна иссиқ прокатланган пўлат лист ишлаб чиқарилади, Тошкент ва Самарқанд металлургия заводларининг прокат листларга бўлган эҳтиёжи тўлиқ қопланади ҳамда 1200 та юқори даромадли иш ўрни яратилади.
Тантанали маросимда Президентимиз мажмуа қурилишида иштирок этган қурувчи ва муҳандислар, технолог ва машинистлар, ишчи-ходимлар, меҳнат фахрийлари ҳамда хорижлик ҳамкорларга самимий миннатдорлик билдирди. Шу билан бирга, комбинатни янада ривожлантиришнинг устувор йўналишлари ҳам белгилаб берилди. Хусусан, корхонанинг хомашёга эҳтиёжини маҳаллий ресурслар ҳисобидан таъминлаш энг муҳим вазифа экани айтилди.
Мамлакатимиз ҳудудларида 1,5 миллиард тонна темир рудаси захираси мавжудлиги таъкидланиб, яқин уч-тўрт йилда Тебинбулоқ конини ишга тушириш орқали йилига 1 миллион тонна пўлат ишлаб чиқариш, Сурунота конидаги маъданларни бойитиш ҳисобига эса йилига 600 минг тонна темир хомашёси олиш йўлга қўйилиши маълум қилинди. Ушбу хомашёни чуқур қайта ишлаш мақсадида комбинатда қиймати 180 миллион долларлик замонавий металлургия заводи қурилиши бошланади.
Келгуси уч йилда 30 миллион доллар инвестиция ҳисобига пўлат шарлар ишлаб чиқариш линиялари босқичма-босқич модернизация қилиниб, уларнинг қуввати 250 минг тоннадан 500 минг тоннагача оширилади. Комбинат ҳудудида Ўзбекистон экологик технологиялар саноат парки ташкил этилиши ҳам кўзда тутилган. Жорий йилнинг ўзида мазкур саноат паркида катта диаметрли қувурлар, кўтарма кранлар ва фильтрлаш ускуналари ишлаб чиқаришга ихтисослашган, умумий қиймати 70 миллион доллар бўлган 6 та лойиҳа бошланади. Уларнинг амалга оширилиши натижасида яна 660 та юқори даромадли иш ўрни очилади.
Мамлакатимиз етакчиси металлургия оғир, шу билан бирга, шарафли касб эканини таъкидлаб, комбинат жамоасининг машаққатли ва фидойи меҳнати юксак эҳтиромга сазоворлигини қайд этди. Салкам бир асрлик тарихга эга корхонада устоз-шогирд анъанаси асосида шаклланган тажриба мактаби кўплаб меҳнат жамоалари учун ибрат экани алоҳида урғуланди.
Давлатимиз раҳбари рамзий тугмани босиб, янги қуюв-прокатлаш мажмуаси фаолиятига тантанали равишда старт берди ҳамда соҳа фахрийлари, комбинат ходимлари ва хорижлик ҳамкорлар билан самимий мулоқот қилди.
Президентимиз Ўзбекистон металлургия комбинати қуюв-прокатлаш мажмуасининг ягона бошқарув пульти орқали метални прокатлаш жараёнларини кўздан кечирди. Замонавий рақамли ечимлар асосида ташкил этилган бошқарув маркази ишлаб чиқаришнинг барча асосий босқичларини ягона тизим орқали мувофиқлаштириш, технологик жараёнлар узлуксизлиги ва самарадорлигини таъминлаш имконини бермоқда.
Кейинги йилларда комбинатни модернизациялаш, ишлаб чиқариш қувватини кенгайтириш ва иқтисодий самарадорлигини ошириш бўйича изчил ишлар бажарилди. Натижада комбинатнинг соф фойдаси 2017 йилдаги 14 миллион доллардан 2025 йилга келиб, 23 миллион долларга етди.
Президентимиз 2018 йил 29 август куни Бекобод шаҳрига ташрифи чоғида айнан мазкур қуюв-прокатлаш мажмуаси қурилиши лойиҳасига тамал тошини қўйган эди. Умумий қиймати 839 миллион долларни ташкил қиладиган мажмуа 18 гектар майдонда барпо этилди. Келгусида бу ерда маҳсулот ишлаб чиқариш ҳажмини 2 миллион тоннага етказиш, қўшимча равишда 1,04 миллион тонна ўрамли пўлат лист прокати ишлаб чиқариш ҳамда комбинатдаги жами иш ўринлари сонини 7 мингтага етказиш режалаштирилган.
Мажмуада Италиянинг “Danieli” компанияси тажрибаси асосида илк бор узлуксиз пўлат қуйиш ускунаси бошқа барча технологик жиҳозлар билан интеграция қилиниб, ягона пульт орқали бошқарилмоқда. Мазкур технологик ечим ишлаб чиқариш жараёнларини марказлаштирилган ҳолда назорат қилиш, ускуналар фаолиятини мувофиқлаштириш ва самарадорликни ошириш имконини яратади. Аввалги технологияларда 4-5 та бошқарув пультидан фойдаланилган ва уларда 9 ходим меҳнат қилган бўлса, бугунги кунда ягона бошқарув тизими орқали бутун жараённи атиги 3 мутахассис назорат қилмоқда.
Давлатимиз раҳбари ушбу тизимни янада такомиллаштириш масаласига алоҳида эътибор қаратиб, ягона бошқарув платформасига сунъий интеллект технологияларини жорий этиш орқали мажмуанинг барқарорлиги ва иқтисодий самарадорлигини янада ошириш зарурлигини таъкидлади. Замонавий технологияларни ишлаб чиқариш жараёнларига кенг татбиқ этиш корхонанинг рақобатбардошлигини мустаҳкамлаш билан бирга маҳсулот сифати ва меҳнат унумдорлигини янада юксалтиришга хизмат қилиши қайд этилди.
Мажмуанинг технологик имкониятлари билан танишув чоғида ускуналар хавфсизлиги ва тезкорлиги бўйича ушбу лойиҳа Марказий Осиёда ўзига хос ҳамда муқобили йўқ экани билдирилди. Хусусан, ишлаб чиқариш жараёнини тўхтатмаган ҳолда, инсон омили иштирокисиз асосий валларни аввалги 30-40 дақиқа ўрнига атиги 5-7 дақиқада автоматик равишда алмаштириш имконияти яратилгани замонавий технологик ечимларнинг муҳим афзалликларидан биридир.
Президентимиз лист прокатидан тайёрланган маҳсулотлар намуналарини кўздан кечирди. Мутасаддилар томонидан иссиқ прокатланган лист маҳсулоти асосида шаклланаётган қўшилган қиймат занжири, республикамизда ишлаб чиқаришни ўзлаштириш тавсия этилаётган янги маҳсулот турлари юзасидан ахборот берилди. Қурилиш соҳасида арматура маҳсулотлари муомаласини тартибга солиш, қурилиш объектларида қора металл прокатидан фойдаланиш устидан назоратни кучайтириш ҳамда сейсмик хавфни камайтиришга қаратилган амалий чора-тадбирлар ҳақида ҳам батафсил маълумот тақдим этилди.
Мамлакатимиз етакчисининг Бекободга ташрифининг асосий воқеаларидан бири, шубҳасиз, қора металлургия саноатини янги босқичга олиб чиқиш бўйича устувор вазифаларга бағишланган йиғилиш бўлди. Негаки йиғилиш мавзуси долзарб, кўтарилган масалалар эътиборга молик. Қора металлургия темир, чўян, пўлат ва уларнинг қотишмаларини қазиб олиш, қайта ишлаш ва ишлаб чиқаришга ихтисослашган оғир саноатнинг асосий тармоғидир. Қурилиш, машинасозлик, автомобилсозлик ва инфратузилма каби соҳалар учун бошланғич хомашё ва тайёр маҳсулотлар айнан шу тармоқ ривожига боғлиқ. Сўнгги йилларда мамлакатимизда қурилиш-бунёдкорлик ишлари кўлами тобора ортиб бораётгани, машинасозлик ва автомобилсозлик саноати жадал тараққий этаётганини инобатга олсак, қора металлургия тармоғи аҳамиятини янада чуқурроқ англай бошлаймиз.
Биз 2030 йилда ялпи ички маҳсулотни 240 миллиард долларга етказишни мўлжаллаганмиз. Бунинг учун эса 8-9 фоизли ўсиш талаб этилади. Демак, қора металлургия, умуман, металлургия саноатига эътибор айни зарурат.
Шу боис, йиғилишда тармоқда импортга боғлиқлик, таннарх ва энергия сарфи юқорилиги, рақамлаштириш ва сунъий интеллектни жорий қилиш борасидаги ишларда камчиликлар борлиги кўрсатиб ўтилди. Бу жараён, айниқса, дунёда кузатилаётган зиддиятлар ёки ташиш муаммолари мавжуд даврда жуда муҳим.
Қолаверса, сўнгги ўн йилда мамлакатимизда пўлат лист, навли прокат, қувурлар ва металл конструкцияларга эҳтиёж 3 карра ортиб, 5,5 миллион тоннага етди. Янги қурилаётган атом электр станцияси, тўртинчи мис бойитиш фабрикаси ва янги мис эритиш заводининг ўзига 2,5 миллион тоннага яқин пўлат лист ҳамда арматура зарур.
Келгуси беш йил давомида 180 миллиард долларлик янги қувватлар ишга туширилади. 27 миллиард долларлик инфратузилма лойиҳалари амалга оширилиб, 800 минг хонадонли кўп қаватли уй-жойлар барпо этилади. Натижада металл маҳсулотларига йиллик эҳтиёж 2030 йилгача 1,5 баробар кўпайиб, 8 миллион тоннадан ошади. Булар, табиийки, мамлакатимизнинг йирик ишлаб чиқарувчиси — Бекобод металлургия комбинати жамоаси зиммасига катта масъулият юклайди. Замон билан ҳамқадам бўлишни, илғор технологияларни амалда қўллаш ишларини жадаллаштиришни тақозо этади.
Айни пайтда комбинатда металл прокатнинг 40 фоизи иккиламчи металл, 60 фоизи импорт ҳисобидан ишлаб чиқарилмоқда. Республикамиз бўйича ҳар йили 700 минг тонна қора металлолом комбинатга топширилаётган бўлса-да, яна 500 минг тоннаси хуфиёна айланмада қолмоқда.
Металлургия соҳасида 150 га яқин ўрта ва кичик хусусий корхона фаолият юритмоқда. Шундан келиб чиқиб айтиш мумкинки, йиғилишда давлатимиз раҳбари томонидан билдирилган таклиф ва масалалар фақат ушбу тармоққа тегишли эмас. Улар мамлакатимиз келажаги, иқтисодиётимиз барқарорлиги, саноатимиз салоҳияти йўлидаги энг муҳим ва керакли ташаббуслардир. Масалан, қора металл айланмаси билан боғлиқ барча жараёнлар электрон платформа орқали реал вақт режимида мониторинг қилинади. Соғлом рақобат муҳити ва нарх барқарорлигини таъминлаш, таъсирчан назорат механизмларини ўрнатиш мақсадида алоҳида Лойиҳа офиси ташкил этилади. 1 августдан “E-lom” электрон платформаси ишга туширилиб, қора металл айланмаси назорати йўлга қўйилади.
Айни пайтда мамлакатимизда 1,5 миллиард тонна темир руда захираси мавжуд. Хитойлик ҳамкорлар билан Сурунота конидан йилига 650 минг тонна темир хомашёси олиш бўйича келишувга эришилган. Тебинбулоқ конини ишга тушириш орқали эса йилига 1 миллион тонна пўлат ишлаб чиқариш имкони яратилади. Тожикистон металлургия комбинатидан йилига 700 минг тонна темир хомашёси олиб келинади. Йиғилишда бу ишларни тезлаштириш зарурлиги қайд этилди. Қолаверса, геология-қидирув ишларидан тортиб, тайёр маҳсулотгача бўлган жараён занжирини яратиш ҳам айни муддао.
Металл маҳсулотлари турини кўпайтириш, йирик комбинатлар ва хусусий корхоналар ўртасида кооперацияни кучайтириш масалалари эътибордан четда қолмади. Бекобод металлургия комбинатида ташкил этиладиган Ўзбекистон экологик технологиялар саноат парки ва у ерда қора металлар бўйича R&D марказ ва халқаро сертификат берадиган замонавий лаборатория ишга туширилиши бунда қўл келади.
Шунингдек, Самарқанд, Жиззах, Наманган ва Сирдарёдаги йирик металлургия корхоналари атрофида жами 100 миллион долларлик кооперация лойиҳалари дастурини ишлаб чиқиш вазифаси қўйилди. Металлургия корхоналарида сунъий интеллект ва рақамлаштириш орқали ускуналардан фойдаланиш самарадорлигини 20 фоиз ошириш, таннархни 10 фоиз, энергия сарфини 15 фоиз, техник хизмат харажати ва технологик узилишларни 20 фоиз қисқартириш бўйича дастур ишлаб чиқилади.
Иқтисодий тадқиқотлар ва ислоҳотлар маркази металлургия саноатига “ақл маркази” сифатида белгиланди. Шунингдек, соҳага Навоий ва Олмалиқ комбинатларининг илмий марказлари, технологик металлар комбинатининг Ўзбекистон — Корея илмий-технологик маркази, Тошкент давлат техника университети, Навоий кончилик ва технологиялар университети, Олмалиқ техника институти ҳамда Москва пўлат ва қоришмалар институтининг Олмалиқ филиали бириктирилди. Улар бозорни ўрганади, лойиҳаларни йўналтиради, кадрлар эҳтиёжини таҳлил қилади. Бир сўз билан айтганда, саноатга илм уйғунлашади.
Янги ўқув йилидан Бекобод металлургия комбинатида қора металлургия бўйича кафедра очилиб, дуал таълим йўлга қўйилади. Иқтисодий тадқиқотлар ва ислоҳотлар марказида шу соҳага тегишли муаммоларни бир жойга жамлайдиган рақамли платформа ишга туширилади. Илмий ишланмаларни молиялаштириш ва амалиётга жорий қилиш бўйича венчур фонд ташкил этилади.
Қисқаси, энди бу йўналишда ҳам ишлар янгича тус олиб, даврга мос лойиҳалар рўёбга чиқарилади. Давлатимиз раҳбари таъбири билан айтганда, соҳада “технологик сакраш” бўлади.
Йиғилишда соҳа мутасаддилари ва ҳудудлар раҳбарлари ҳисоботлари ҳам тингланди.
Бекобод шаҳрига ташрифнинг навбатдаги манзили Дўстлик маҳалласи бўлди. Мамлакатимиз етакчиси ушбу маҳалла ва Хосёз канали бўйида амалга оширилган бунёдкорлик ишлари билан танишди.
Бекободликлар яхши билади, илгари Хосёз каналининг бўйи қаровсиз, тартибсиз бир аҳволда эди. Кейинги йиллардаги ўзгаришлар, жойларда инфратузилмани яхшилашга қаратилган ислоҳотлар сабаб Хосёз канали бўйи энг гўзал гўшалардан бирига айланди.
Ушбу манзилни комплекс ривожлантириш учун мастер-режа доирасида пиёдалар учун 3 километр узунликда махсус йўлак ва 5,4 километр мустаҳкам тўсиқлар барпо этилди. Бундан ташқари, 2 та кўприк қурилди. Шу каби ишлар натижасида канал бўйи барча қулайликларга эга замонавий экологик ҳудудга айланди. Бу эса бекободликлар қувончига сабаб бўлмоқда. Негаки энди улар маҳалласидан унча узоқ бўлмаган жойда бемалол сайр қилиб, ҳордиқ чиқариши мумкин. Бунинг учун лойиҳа доирасида соҳил бўйида 27 та янги савдо ва замонавий хизмат кўрсатиш объекти очилган. Муҳими, ушбу объектлар сабаб 167 та янги доимий иш ўрни яратилди.
Давлатимиз раҳбари бу ерда спорт билан шуғулланаётган ёшлар билан суҳбатлашди.
Ҳудуди 28 гектар бўлган Дўстлик маҳалласида ҳозир 33 та кўп қаватли уй, хусусий мактабгача таълим ташкилоти, футбол майдони, 16 та спорт ва болалар майдончаси ва кутубхона бор. Буларни бирма-бир таъкидлаётганимиздан муддао шуки, маҳаллада ёшларнинг ҳар жиҳатдан соғлом ва баркамол бўлиб улғайиши учун барча шароит яратилган.
Тадбиркорларга эътибор сабаб жамиятимизда яратувчанлик руҳи билан яшаётганлар сафи кенгайиб бормоқда. Жумладан, жорий йилда тадбиркорларнинг 1,1 миллиард сўм инвестиция маблағи ҳисобидан 10 та хизмат кўрсатиш объекти, битта умумий овқатланиш шохобчаси очилди. Натижада
25 та янги иш ўрни яратилди. Қолаверса, ташаббускорлар маблағлари ҳисобидан “Ватанпарвар боғи” ҳам барпо қилинди. Унда ҳарбий техника намуналари жойлаштирилиб, хизмат кўрсатиш объектлари қурилди.
Маҳалла ҳудудида Бекобод шаҳри музейи ҳам ташкил этилган. Уни бунёд этишда “Ташаббусли бюджет” маблағлари ҳисобидан фойдаланилди. Яъни ушбу музей халқ овози, уларнинг бирдамликдаги ҳаракати эвазига вужудга келди.
Худди шундай ташаббуслар, эзгу ниятлар туғиладиган яна бир манзил нуронийлар учун яратилди. Маҳаллада нуронийлар ва меҳнат фахрийларининг дам олиши, учрашувлар ўтказиб, давра суҳбатлари қуриши, демакки, маънавий-маърифий тадбирлар учун ёғоч конструкцияли ёзги шийпон қад ростлади.
Президентимиз маҳаллада аҳоли учун яратилган шароитлар билан танишди, маҳалла фаоллари ва меҳнат фахрийлари билан самимий мулоқот қилди.
— Барча ишларимиз, барпо этилаётган объектларимиз ва лойиҳаларимиз, аввало, аҳолига хизмат қилиши, инсонлар ҳаётини яхшилаши керак. Одамлар ўз маҳалласида, шаҳрида кечаётган ўзгаришларни ҳис қилиши, самарасини кундалик ҳаётида кўриши керак.
Ҳар сафар ҳудудларга келганимизда инсонлар янги Ўзбекистон ислоҳотлари нафасини, унинг янгиланиш ва тараққиёт шабодасини ҳис этиши зарур. Бекобод шаҳри ҳам меҳнаткаш ва фидойи аҳолиси, иқтидорли ёшлари, ҳаёт тажрибасига эга нуронийлари билан янада обод ва тараққий этган масканга айланиши керак.
Биз ёшларимизнинг орзу интилишлари, нуронийларимизнинг эзгу ният ва мақсадлари рўёбга чиқиши учун барча имкониятларни сафарбар этамиз, — деди Президентимиз.
Шу билан Президентимизнинг Бекобод шаҳрига ташрифи якунланди.
Дилшод УЛУҒМУРОДОВ,
Авазбек ХУДОЙҚУЛОВ,
“Янги Ўзбекистон” мухбирлари
