Мазкур битим Устюрт минтақасида жойлашган Бойтерак, Теренгқудуқ, Бирқори, Ҳарой, Қорақалпоқ ва Қулбой блокларини қамраб олади.

Имзолаш маросимида Жўрабек Мирзамаҳмудов, Абдуғани Сангинов, Ровшан Нажаф ҳамда Джиованни Кристофоли иштирок этди.

Қайд этилишича, мазкур лойиҳа бп компаниясининг Ўзбекистондаги илк ташаббуси ҳисобланади ва у «Ўзбекнефтгаз» АЖ ҳамда SOCAR билан ҳамкорликда амалга оширилади.

Томонлар фикрича, юқори ресурс салоҳиятига эга мазкур лойиҳа нефть-газ захираларини қидириш ва ўзлаштириш ишларини кенгайтириш, шунингдек, узоқ муддатли иқтисодий манфаатлар яратишга хизмат қилади.

Шунингдек, маҳсулот тақсимотига оид битим бпнинг қидирув портфелини кенгайтириш ва узоқ муддатли ўсиш стратегиясининг муҳим қисми экани таъкидланди.

Битимдаги улушлар қуйидагича тақсимланган:

  • bp — 40 фоиз;
  • SOCAR — 30 фоиз;
  • «Ўзбекнефтгаз» АЖ — 30 фоиз.

Маълумот учун, мазкур маҳсулот тақсимоти битими дастлаб 2025 йил 24 июль куни Ўзбекистон Республикаси Энергетика вазирлиги, «Ўзбекнефтгаз» АЖ ва SOCAR ўртасида имзоланган.

Ҳозирда лойиҳанинг биринчи босқичи амалга оширилмоқда ва SOCAR оператор сифатида сейсмик қидирув ишларини олиб бормоқда.