Янги конларни ўзлаштириш, мавжуд қудуқларни таъмирлаш ва замонавий технологияларни жорий этиш «Ўзбекнефтгаз»нинг тўққиз ойлик фаолиятидаги асосий йўналишлардан бўлди.
Компания маълумотларига кўра, январь–сентябрь ойларида 80 та қудуқ бурғиланиб, «Қизилжар», «Шағирлик» (қуйи юра), «Телегри», «Гулшанбоғ» ва «Каприн» газ конлари очилди. Шунингдек, 114 та қудуқни таъмирлаш ҳисобига кунлик газ қазиб чиқариш қўшимча 4 миллион куб метрга оширилди.
Қудуқларни таъмирлаш ишлари доирасида 35 та қудуқда мукаммал таъмирлаш амалга оширилди. Октябрь ойи бошидан эса жамият бўйича кунлик газ қазиб чиқариш 1,6 миллион куб метрга кўпайди.
Геология-қидирув ишлари ҳам кенгайтирилмоқда. Ҳисобот даврида сейсмик тадқиқотлар 7 430 квадрат километр майдонда ўтказилди. Бу 2025 йилга нисбатан беш баравар кўп. 17 та янги майдонда чуқур излов бурғилаш бошланиб, 25 та қудуқ қурилиши якунланди.
Йил охиригача 3Д сейсмик тадқиқотлар қамровини 11 900 квадрат километрга етказиш режалаштирилган. Компания шунингдек, тадқиқот чуқурлигини 8 000 метргача кенгайтиришни кўзламоқда.
Бурғилаш ишларида ташқи пудратчиларга қарамликни камайтириш мақсадида «UNG Burg‘ilash» МЧЖ ташкил этилди. Ушбу корхона учун Хитой компанияларидан 15 та замонавий бурғилаш дастгоҳи харид қилинмоқда. Улар 9 000 метргача чуқурликда ишлаш имкониятига эга бўлади. Лойиҳа доирасида 1 000 дан ортиқ янги иш ўрни яратилиши кутилмоқда.
Саноат маҳсулоти ишлаб чиқариш режаси 105,7 фоизга бажарилди. Тўққиз ойда 41,8 триллион сўмлик маҳсулот ишлаб чиқарилди. Жумладан, 773,5 минг тонна автобензин, 759,7 минг тонна дизель ёқилғиси, 210,6 минг тонна авиакеросин ва 452,7 минг тонна суюлтирилган газ тайёрланди.
Компания келгусида республикада илк бор синтетик мой, тозаланган парафин ва чизиқли алкилбензол ишлаб чиқаришни йўлга қўйишни режалаштирмоқда. Бу маҳсулотлар импорт ўрнини босиш ва маҳаллий саноатни хомашё билан таъминлашга хизмат қилиши кутилмоқда.
Қиш мавсумига тайёргарлик доирасида нефт базаларида бензин захираси ўтган йилнинг шу даврига нисбатан 2,5 баравар кўп шакллантирилди.
Компаниянинг молиявий натижалари ҳам ижобий бўлди. Ҳисобот даврида экспорт ҳажми 736,7 миллион долларга етди, инвестициялар ўзлаштирилиши 790 миллион долларни ташкил қилди. Маҳаллийлаштириш доирасида 17,3 триллион сўмлик маҳсулот ишлаб чиқарилди.
Харажатларни мақбуллаштириш натижасида 1,9 триллион сўм тежалди. Шунингдек, компания улуши мавжуд корхоналардан 2,6 триллион сўм дивиденд ҳисобланди ва давлат бюджетига 6,9 триллион сўм тўланди.
Компания кредит харажатларини камайтириш ишларини ҳам давом эттирмоқда. 69 та кредит шартномасининг 41 таси бўйича қайта молиялаштириш ва муддатидан олдин сўндириш ҳисобига 18 миллион доллар фоиз харажати тежалди.
Ходимларнинг меҳнат ва яшаш шароитларини яхшилаш мақсадида тўққиз ойда ойлик маошлар 21 фоизга оширилди. Устюртда 160 ўринли, Шўртанда эса 130 ўринли ётоқхоналар фойдаланишга топширилди. Шунингдек, ишчиларни кунига бир маҳал бепул иссиқ овқат билан таъминлаш йўлга қўйилди.
Конларда ишчиларни ташиш ва меҳнат шароитларини яхшилаш учун 52 та махсус йўлтанламас автомобиль ва 58 та замонавий автобус харид қилинди.
Компания маълумотларига кўра, амалга оширилаётган ислоҳотлар газ қазиб чиқаришни кўпайтириш, янги конларни ўзлаштириш, импортга қарамликни камайтириш ва молиявий барқарорликни мустаҳкамлашга қаратилган.
“Ўзбекнефтгаз” АЖ Ахборот хизмати
Ҳамкорлик материали
