Тянь-Шань қўнғир айиғи минтақа тоғ экотизимларидаги энг йирик йиртқичлардан биридир. У Ўзбекистон Қизил китобига заиф мақомдаги, кенг тарқалган, аммо мозаик тарқалишга эга кенжа тур сифатида киритилган. Ушбу ҳайвон Ғарбий Тянь-Шаннинг бориш қийин бўлган ҳудудларида яшайди ва табиий мувозанатни сақлашда муҳим рол ўйнайди. Сибир тоғ эчкиси эса баланд тоғли ҳудудларнинг ўзига хос вакили ҳисобланади. Мустаҳкам туёқлари ва юқори чидамлилиги туфайли у тик ва тошлоқ ёнбағирларда ишонч билан ҳаракатлана олади.
Чотқол давлат биосфера қўриқхонаси Ўзбекистоннинг алоҳида муҳофаза этиладиган табиий ҳудудларидан бири бўлиб, Ғарбий Тянь-Шаннинг ноёб тоғ экотизимлари ҳамда бой биологик хилма-хиллигини асраб-авайлашга хизмат қилмоқда.
