Бугун республиканинг катта қисмида ёғингарчиликсиз об-ҳаво сақланиб қолади. Фақат Қорақалпоғистон Республикаси, Хоразм вилояти ҳамда кечқурун Тошкент вилоятининг айрим ҳудудларида қисқа муддатли ёмғир ёғиши, момақалдироқ бўлиши мумкин. Ҳаво ҳарорати 30–33 даража, жанубий ва чўл ҳудудларида эса 35–37 даражагача кўтарилади.
4 июль куни Фарғона водийсида, шунингдек, кечаси ва эрталаб Тошкент, Жиззах ҳамда Сирдарё вилоятларида қисқа муддатли ёмғир ёғиши ва момақалдироқ кузатилиши прогноз қилинмоқда. Ҳаво ҳарорати деярли ўзгармайди.
5 июль, якшанба куни республика бўйича ёғингарчилик кутилмайди. Ҳарорат яна кўтарилиб, кундузи 34–37 даражани, жанубий ҳудудларда эса 39 даражагача етади.
Шамол шарқдан 7–12 метр/секунд тезликда эсади. 3 июль куни айрим жойларда, айниқса чўл ҳудудларида шамол тезлиги 15–20 метр/секундгача кучайиши, чанг-тўзонлар кузатилиши мумкин.
3–4 июль кунлари тоғолди ва тоғли ҳудудларда вақти-вақти билан қисқа муддатли ёмғир ёғиб, момақалдироқ бўлиши кутилмоқда. Мутахассислар ушбу ҳудудларда сел-сув тошқинлари юзага келиши эҳтимолидан огоҳлантирди.
Пойтахтда 4 июль куни кечаси ва эрталаб қисқа муддатли ёмғир ёғиши, момақалдироқ кузатилиши мумкин. Кундузи ёғингарчилик кутилмайди, ҳарорат 31–33 даража бўлади.
5 июль куни Тошкентда ёғингарчилик прогноз қилинмаяпти. Кундузги ҳарорат 34–36 даражагача кўтарилади. Кечалари ҳаво 18–23 даража атрофида бўлади.
