Янги тартибга кўра, 6 ойлик узлуксиз суғурта стажини ҳисоблашда меҳнат муносабатлари сақланиб қолган ҳолда иш ҳақи тўланмаган ойлар, жумладан, ўз ҳисобидан олинган таътил ҳамда касаллик даври суғурта стажининг узилишига сабаб бўлмайди.
Шунингдек, кам маош олувчи ва тўлиқ бўлмаган ставкаларда ишловчи ходимларнинг ҳам суғурта стажи ҳисобга олинади. Агар ойлик иш ҳақи меҳнатга ҳақ тўлаш энг кам миқдорининг бир баравари ёки ундан кўп бўлса, 1 ойлик, бир баравардан кам бўлса, ярим ойлик суғурта стажи сифатида ҳисобланади.
Туғиш қийин кечган ёки икки ва ундан ортиқ фарзанд туғилган ҳолатларда декрет таътили узайтирилса, қўшимча нафақа аввалги ҳисоб-китоб кўрсаткичлари асосида белгиланади. Бу нафақа миқдорининг асоссиз камайиб кетишининг олдини олади.
Янги тартиб натижасида қўшимча 3 минг нафарга яқин аёлда декрет нафақасини олиш ҳуқуқи пайдо бўлади.
Муҳими, мазкур ўзгаришлар 2026 йил 13 майдан бошлаб юзага келган суғурта ҳодисаларига ҳам татбиқ этилади.
