"Дунё" ААнинг маълум қилишича, ҳамюртимиз Россия миграция қонунларини бузгани оқибатида унинг икки ойлик гўдаги васийликка олиниб, Новосибирск шаҳридаги “Рассвет” болалар ва ўсмирлар реабилитация марказига жойлаштирилган.
Ўзбекистоннинг Новосибирск шаҳридаги Бош консулхонаси вазиятдан хабар топгач, муаммони ҳал этиш учун тезкор чораларни кўрди.
Дипломатлар хорижий фуқароларни вақтинча сақлаш маркази ҳамда реабилитация маркази вакиллари билан музокаралар олиб борди. Натижада она ва боланинг ватанга қайтиши учун зарур ҳужжатлар расмийлаштирилди.
Амалга оширилган саъй-ҳаракатлар натижасида Бош консулхона вакиллари чақалоқни реабилитация марказидан олиб, Новосибирск аэропортида кутиб турган онаси бағрига топширди.
Она ва бола 28 август куни Россия авиакомпанияси рейси билан Тошкентга қайтарилди.
