Ички ишлар вазирлиги маълумотига кўра, Тошкент вилоятининг Ангрен шаҳрида яшовчи 25 ёшли аёл қўлга олинган.
Дастлабки маълумотларга кўра, гумонланувчи Дубай шаҳрида яшовчи танишлари билан жиноий тил бириктириб, Жиззах вилояти Мирзачўл туманида яшовчи 20 ёшли қизга хорижда юқори маошли иш таклиф қилинганини айтган ва уни чет элга жўнатишга уринган.
Терговда аниқланишича, аслида жабрланувчини Бирлашган Араб Амирликларига жинсий эксплуатация мақсадида олиб чиқиш режалаштирилган. Қиз Тошкент халқаро аэропорти орқали Дубай шаҳрига жўнатилаётган вақтда ҳуқуқни муҳофаза қилувчи органлар томонидан тезкор чоралар кўрилиб, жиноятга чек қўйилган.
Шунингдек, жабрланувчини Дубай шаҳрида Ўзбекистон фуқароларидан бири кутиб олиши режалаштирилгани маълум бўлган.
Мазкур ҳолат юзасидан гумонланувчига нисбатан Жиноят кодексининг 135-моддаси иккинчи қисми тегишли бандлари билан жиноят иши қўзғатилган. Айни пайтда тергов ҳаракатлари олиб борилмоқда.
Ҳуқуқни муҳофаза қилувчи органлар жиноятга алоқадор бўлиши мумкин бўлган бошқа шахсларни аниқлаш ва уларни жавобгарликка тортиш чораларини кўрмоқда.
