Қайд этилишича, мусобақанинг дастлабки 72 та ўйинида рекорд даражада — 215 та гол урилган. Улар орасидан FIFA мутахассислари 12 та энг сара голни танлаб олган.
Номзодлар орасида Аргентина терма жамоаси сардори Лионель Месси, Франция ҳужумчиси Килиан Мбаппе, Бразилиялик Винисиус Жуниор каби юлдузлар билан бир қаторда, Ўзбекистон миллий терма жамоаси сардори Элдор Шомуродов ҳам бор.
Шомуродовнинг Конго ДР терма жамоаси дарвозасига урган аниқ ва маҳоратли лоб зарбаси гуруҳ босқичининг энг чиройли голларидан бири сифатида эътироф этилди. Мазкур гол Ўзбекистоннинг жаҳон чемпионатидаги дебют иштирокидаги энг ёрқин лаҳзалардан бири бўлди.
FIFA маълумотига кўра, овоз беришнинг биринчи босқичи 48 соат давом этади. Ғолиб бўлган гол алоҳида эълон қилинади. Кейинги босқичларда эса 1/16 финал, нимчорак финал, чорак финал, ярим финал ҳамда мусобақа якунларига кўра яна бир неча босқичли овоз бериш жараёнлари ўтказилади.
Мухлислар ўзларига маъқул бўлган гол учун FIFA расмий платформаси орқали овоз беришлари мумкин.
