Эътиборлиси, болакай ушбу натижага илк уринишдаёқ эришган. Энди савол: саккиз ёшли боланинг бундай натижага эришишига сабаб нима?

Бунда хаёлимизга келадиган илк жавоб оиладаги муҳит ва давлатнинг таълимга эътибори бўлиши аниқ. Чунки амалда ҳам шундай. Юртимизда таълимни ривож­лантиришга қаратилган чора-тадбирлар, ўқиб-ўрганиши учун яратилаётган имкониятлар туфайли фарзандларимиз нафақат маҳаллий, балки хорижнинг энг олди олийгоҳларида таҳсил олмоқда. Спортда, санъатда, фан олимпиадаларида юқори ўринларни эгаллаб, дунёни лол қолдирмоқда. Ахир имконият бўлмаса, шундай натижаларга эришиш мумкинми? Албатта, йўқ.

Энди муҳит ҳақида. Муҳаммадалининг онаси уй бекаси, отаси Навоий кон-металлургия комбинати тизими ишчиси. Оддий оила. Бугун ёш оилалар сармояни қаерга сарфлаш кераклигини, илм барча жумбоқ калити эканини тушуниб етяпти. Одамлар тафаккури ўзгарган. Боласига “ўқиб олим бўлармидинг”, деган танбеҳлар ўрнига бугун “ўқи, олим бўл”, дегувчилар кўпайди.

Билимсизлик инсоният учун энг қоронғи тундир деган ҳикмат бор. Дарҳақиқат, илм инсонни улуғлайди, юксакликка кўтаради, билимсизлик эса аксинча, чорасизликка олиб келади, тубанликка етаклайди. Эртасини, фарзандлари келажагини ўйлаган жамият илмга зўр беради. Бу жамият эса эътибор, қўллаб-қувватлов, ғамхўрлик асосида шаклланади.

Ўзбекистонда бу борада ишлаб чиқилаётган лойи­ҳалар, қилинаётган ишлар, кенг кўламли ислоҳотлар самарасига ҳар жабҳада мисол кўп. Юртимизда ёшлар билан ишлаш масаласи узлуксизлик касб этган. Ушбу йўналишда қабул қилинаётган қарор, фармон ёки қонунлардан ташқари навқирон авлод вакиллари билан Президентимиз йилда икки бор учрашиб, мулоқот қилмоқда. 30 июнь — Ёшлар куни сифатида кенг нишонланади. Бу сана нафақат ёшлар байрами, балки мамлакат равнақи учун ғоялар, ташаббуслар, инновациялар майдони сифатида намоён бўлади.

Кеча давлатимиз раҳбарига тақдим қилинган “Янги Ўзбекистон ёшлари — 2030” стратегияси лойиҳаси нав­қирон авлод вакиллари имкониятини янада кенгайтиради. Чунки унда белгиланган вазифалар кўлами жуда кенг. Мақсад катта. У мамлакатимизда ёшларга оид қабул қилинаётган биринчи яхлит стратегия экани, юртимиз келажагини барпо этишда ёшларнинг ўрни ва салоҳиятини тўлақонли рўёбга чиқаришга қаратилгани алоҳида эътироф этилди.

Бугун юртимизда 9,5 миллион, яъни жами аҳолининг қарийб 25 фоизи 14-30 ёшдаги йигит-қизлар. Ҳар йили 270 мингта ёш оила шаклланмоқда. Ана шу демографик омил ёшлар сиёсатига узоқ муддатли ва тизимли ёндашувни талаб этмоқда. Стратегия айни мақсадда ишлаб чиқилди ва унда ёшларга оид барча жабҳа қамраб олинган. Бандликни таъминлаш, тадбиркорликни қўллаб-қувватлаш, сифатли таълимни ривожлантириш, хорижий тилларни оммалаштириш, касбий таълимни кенгайтириш, ёш оилаларни қўллаб-қувватлаш каби ишлар давлат томонидан кўрсатиладиган ғамхўрлик ҳамда имкониятни англатса, маданий, жисмоний ва маърифий ривожланиш, волонтёрлик ҳаракатини кенг ёйиш, саломатлик, шунингдек, очиқлик ва иштирок механизмлари йигит-қизларни фаолликка чорлайди.

Албатта, қарс икки қўлдан чиқади. Барака — ҳаракатда. Стратегия ёшларга бу борада қўл келади. Имконият беради. Масалан, стратегияни 2026-2027 йилларда амалга ошириш доирасида 7 йўналиш бўйича 56 та лойи­ҳа бажарилади. “Янги авлод тадбиркорлари” ­дастурида Гарвард, Стэнфорд, MIT, Лондон бизнес мактаби каби нуфузли таълим муассасалари билан ҳамкорликда
20 минг ёшни ўқитиш, мингта бизнес лойиҳасини саралаб олиш ва уларга 3 йилгача муддатга базавий ҳисоблаш миқдорининг 500 бараваригача ссуда бериш режалаштирилган. Ёш тадбиркорларнинг муҳандислик тармоқларига уланиш харажати қисман қоплаб берилади. Респуб­лика бўйича “Ўзбекистон ёшларни севади!” лойиҳаси, “Ҳаёт фест” ёшлар фестивали, “Talaba Fest” ва “Talaba Expo 2026” каби тадбирлар ўтказилади. Робототехника ассоциациясининг фаолияти қўллаб-қувватланади.

Ҳар йили 600 минг ёшнинг бандлиги таъминланади. 2030 йилга қадар 900 минг ёш волонтёрликка жалб этилади.Ўқув марказлари сони 90 мингтага етказилади. 450 минг ёшнинг хорижий тиллар бўйича билими B2 даражасига олиб чиқилади. Ёшлар жиноятчилиги камайтирилади. Таълим соҳасида ёшларнинг сифатли билим олиши, нодавлат таълим хизматларини қўллаб-қувватлаш, чекка ҳудудларда ўқув марказлари имкониятларини кенгайтириш, хорижий тилларни ўрганишни рағбатлантириш бўйича янги имтиёзлар назарда тутилган.

Давлатимиз раҳбари жорий йил 24 февраль куни Кўксарой қароргоҳида ёшлар билан мулоқот чоғида Тошкент шаҳрида Жаҳон ёшларининг тинчлик сари ҳаракати бош қароргоҳи ташкил этилишини, Самарқанд шаҳрида Ёшлар парламенти аъзоларининг 12-глобал конферен­цияси, 46-Бутунжаҳон шахмат олимпиадаси ўтказилишини айтган эди. Мазкур ташаббуслар мамлакатимизда ёшлар масаласи долзарб ва мунтазамлик касб этиши баробарида, тобора ривожланиб, кенгайиб бораётганини англатади. Қолаверса, бу Ўзбекистон ёшларига ўз салоҳиятини юзага чиқариш учун катта майдондир.

Сўзимиз аввалида мисол келтирганимиз Муҳам­мадали Юсупов муваффақияти эса мана шу катта майдонга хос ютуқлардан бири, холос. Чунки бугун юртимизда бунга ўхшаш ютуққа эришаётган ёшлар сафи тобора кенгайиб бормоқда.

Дилшод УЛУҒМУРОДОВ,

“Янги Ўзбекистон” мухбири