Eʼtiborlisi, bolakay ushbu natijaga ilk urinishdayoq erishgan. Endi savol: sakkiz yoshli bolaning bunday natijaga erishishiga sabab nima?

Bunda xayolimizga keladigan ilk javob oiladagi muhit va davlatning taʼlimga eʼtibori boʻlishi aniq. Chunki amalda ham shunday. Yurtimizda taʼlimni rivoj­lantirishga qaratilgan chora-tadbirlar, oʻqib-oʻrganishi uchun yaratilayotgan imkoniyatlar tufayli farzandlarimiz nafaqat mahalliy, balki xorijning eng oldi oliygohlarida tahsil olmoqda. Sportda, sanʼatda, fan olimpiadalarida yuqori oʻrinlarni egallab, dunyoni lol qoldirmoqda. Axir imkoniyat boʻlmasa, shunday natijalarga erishish mumkinmi? Albatta, yoʻq.

Endi muhit haqida. Muhammadalining onasi uy bekasi, otasi Navoiy kon-metallurgiya kombinati tizimi ishchisi. Oddiy oila. Bugun yosh oilalar sarmoyani qayerga sarflash kerakligini, ilm barcha jumboq kaliti ekanini tushunib yetyapti. Odamlar tafakkuri oʻzgargan. Bolasiga “oʻqib olim boʻlarmiding”, degan tanbehlar oʻrniga bugun “oʻqi, olim boʻl”, deguvchilar koʻpaydi.

Bilimsizlik insoniyat uchun eng qorongʻi tundir degan hikmat bor. Darhaqiqat, ilm insonni ulugʻlaydi, yuksaklikka koʻtaradi, bilimsizlik esa aksincha, chorasizlikka olib keladi, tubanlikka yetaklaydi. Ertasini, farzandlari kelajagini oʻylagan jamiyat ilmga zoʻr beradi. Bu jamiyat esa eʼtibor, qoʻllab-quvvatlov, gʻamxoʻrlik asosida shakllanadi.

Oʻzbekistonda bu borada ishlab chiqilayotgan loyi­halar, qilinayotgan ishlar, keng koʻlamli islohotlar samarasiga har jabhada misol koʻp. Yurtimizda yoshlar bilan ishlash masalasi uzluksizlik kasb etgan. Ushbu yoʻnalishda qabul qilinayotgan qaror, farmon yoki qonunlardan tashqari navqiron avlod vakillari bilan Prezidentimiz yilda ikki bor uchrashib, muloqot qilmoqda. 30-iyun — Yoshlar kuni sifatida keng nishonlanadi. Bu sana nafaqat yoshlar bayrami, balki mamlakat ravnaqi uchun gʻoyalar, tashabbuslar, innovatsiyalar maydoni sifatida namoyon boʻladi.

Kecha davlatimiz rahbariga taqdim qilingan “Yangi Oʻzbekiston yoshlari — 2030” strategiyasi loyihasi nav­qiron avlod vakillari imkoniyatini yanada kengaytiradi. Chunki unda belgilangan vazifalar koʻlami juda keng. Maqsad katta. U mamlakatimizda yoshlarga oid qabul qilinayotgan birinchi yaxlit strategiya ekani, yurtimiz kelajagini barpo etishda yoshlarning oʻrni va salohiyatini toʻlaqonli roʻyobga chiqarishga qaratilgani alohida eʼtirof etildi.

Bugun yurtimizda 9,5 million, yaʼni jami aholining qariyb 25 foizi 14-30 yoshdagi yigit-qizlar. Har yili 270 mingta yosh oila shakllanmoqda. Ana shu demografik omil yoshlar siyosatiga uzoq muddatli va tizimli yondashuvni talab etmoqda. Strategiya ayni maqsadda ishlab chiqildi va unda yoshlarga oid barcha jabha qamrab olingan. Bandlikni taʼminlash, tadbirkorlikni qoʻllab-quvvatlash, sifatli taʼlimni rivojlantirish, xorijiy tillarni ommalashtirish, kasbiy taʼlimni kengaytirish, yosh oilalarni qoʻllab-quvvatlash kabi ishlar davlat tomonidan koʻrsatiladigan gʻamxoʻrlik hamda imkoniyatni anglatsa, madaniy, jismoniy va maʼrifiy rivojlanish, volontyorlik harakatini keng yoyish, salomatlik, shuningdek, ochiqlik va ishtirok mexanizmlari yigit-qizlarni faollikka chorlaydi.

Albatta, qars ikki qoʻldan chiqadi. Baraka — harakatda. Strategiya yoshlarga bu borada qoʻl keladi. Imkoniyat beradi. Masalan, strategiyani 2026-2027-yillarda amalga oshirish doirasida 7 yoʻnalish boʻyicha 56 ta loyi­ha bajariladi. “Yangi avlod tadbirkorlari” ­dasturida Garvard, Stenford, MIT, London biznes maktabi kabi nufuzli taʼlim muassasalari bilan hamkorlikda
20 ming yoshni oʻqitish, mingta biznes loyihasini saralab olish va ularga 3 yilgacha muddatga bazaviy hisoblash miqdorining 500 baravarigacha ssuda berish rejalashtirilgan. Yosh tadbirkorlarning muhandislik tarmoqlariga ulanish xarajati qisman qoplab beriladi. Respub­lika boʻyicha “Oʻzbekiston yoshlarni sevadi!” loyihasi, “Hayot fest” yoshlar festivali, “Talaba Fest” va “Talaba Expo 2026” kabi tadbirlar oʻtkaziladi. Robototexnika assotsiatsiyasining faoliyati qoʻllab-quvvatlanadi.

Har yili 600 ming yoshning bandligi taʼminlanadi. 2030-yilga qadar 900 ming yosh volontyorlikka jalb etiladi.Oʻquv markazlari soni 90 mingtaga yetkaziladi. 450 ming yoshning xorijiy tillar boʻyicha bilimi B2 darajasiga olib chiqiladi. Yoshlar jinoyatchiligi kamaytiriladi. Taʼlim sohasida yoshlarning sifatli bilim olishi, nodavlat taʼlim xizmatlarini qoʻllab-quvvatlash, chekka hududlarda oʻquv markazlari imkoniyatlarini kengaytirish, xorijiy tillarni oʻrganishni ragʻbatlantirish boʻyicha yangi imtiyozlar nazarda tutilgan.

Davlatimiz rahbari joriy yil 24-fevral kuni Koʻksaroy qarorgohida yoshlar bilan muloqot chogʻida Toshkent shahrida Jahon yoshlarining tinchlik sari harakati bosh qarorgohi tashkil etilishini, Samarqand shahrida Yoshlar parlamenti aʼzolarining 12-global konferen­siyasi, 46-Butunjahon shaxmat olimpiadasi oʻtkazilishini aytgan edi. Mazkur tashabbuslar mamlakatimizda yoshlar masalasi dolzarb va muntazamlik kasb etishi barobarida, tobora rivojlanib, kengayib borayotganini anglatadi. Qolaversa, bu Oʻzbekiston yoshlariga oʻz salohiyatini yuzaga chiqarish uchun katta maydondir.

Soʻzimiz avvalida misol keltirganimiz Muham­madali Yusupov muvaffaqiyati esa mana shu katta maydonga xos yutuqlardan biri, xolos. Chunki bugun yurtimizda bunga oʻxshash yutuqqa erishayotgan yoshlar safi tobora kengayib bormoqda.

Dilshod ULUGʻMURODOV,

“Yangi Oʻzbekiston” muxbiri