“Қишларида баҳор шивирлайдиган”, “сал кўрмаса қуёш соғинадиган” юртимизда ҳаёт қайнайди. Инсон қадри улуғланган янги Ўзбекистонда улкан ислоҳотлар шабадаси эсади.

Айни шу руҳда Фарғона давлат университетида ўтказилган халқаро Тинчлик форумида таъкидланганидек, Фарғона водийси бир неча ўн йиллар давомида мураккаб зиддиятлар ҳудуди сифатида қабул қилинган. Бугун эса у яхши қўшничилик, очиқлик ва биргаликда бунёдкорлик орқали ишончсизликнинг тарихий меросини енгиб ўтишнинг ёрқин намунаси бўлиб турибди. Форум нафақат муҳокама майдони, балки Марказий Осиёда янги ҳамкорлик фалсафасини шакллантириш йўлидаги муҳим қадам бўлиб хизмат қилди.

Айни пайтда Фарғона вилояти тинчлик ва маънавий уйғонишнинг, иқтисодий барқарорлик ва инновaцион ривожланишнинг замонавий рамзи сифатида дунё ҳамжамиятига ўзини намоён этмоқда.

Жорий йилнинг 7 май куни дунёнинг энг нуфузли рейтинг агентликларидан бири — Fitch Ratings Фарғона вилоятининг хорижий ва миллий валютадаги узоқ муддатли кредит рейтингини “ББ-” даражасида, истиқболини эса “Барқарор” деб баҳолади. Аввалроқ, 2025 йилнинг ноябрь ойида S&P Global Ratings ҳам вилоятни “Б+”дан “ББ-”га кўтарган эди. Икки етакчи агентликнинг бир хил юқори баҳо бериши Фарғонанинг Ўзбекистонда молиявий интизоми, инвестицион жозибадорлиги ва иқтисодий барқарорлиги бўйича етакчи ҳудуд сифатида расман эътироф этилишидир.

Бу баҳо оддий рақам эмас. Бу тинчлик шароитида фидокорона меҳнат, жасоратли ислоҳотлар ва буюк орзулар билан яратилган янги Фарғонанинг халқаро миқёсдаги тантанали тасдиқланишидир.

Fitch Ratings таҳлилида қайд этилишича, вилоят мустақил кредит профилини мустаҳкам сақлаб, қарз юкини бошқариш кўрсаткичини барқарор даражада ушлаб турибди. 2030 йилга қадар қарзни қоплаш коэффициенти хавфсиз диапазонда бўлиши кутилмоқда. Солиқ тушумлари улуши 47 фоизга етгани ва марказий трансфертларга қарамлик камайиши молиявий мустақиллик ортиб бораётганини кўрсатади.

Президентимизнинг яқинда Фарғона вилоятига ташрифи давомида ўтказилган йиғилишда келтирилган рақамлар бу баҳони ёрқин тасдиқлайди: сўнгги йилларда вилоятга 8,2 миллиард доллар инвестиция жалб қилинди, 8 мингдан ортиқ замонавий қувват ишга туширилди, тадбиркорликка 100 триллион сўм йўналтирилди. Натижада ялпи ҳудудий маҳсулот 1,7 баравар, саноат 1,5 баравар, хизмат кўрсатиш соҳаси 3 баравар ўсди. Ишсизлик 9,2 фоиздан 4,6 фоизга, камбағаллик эса 11,6 фоиздан 5,2 фоизга тушди.

Сўнгги йилларда Фарғона халқаро ҳамкорликда катта ютуқларга эришди. Хорижий капитал иштирокидаги корхоналар сони

124 тадан 900 тага ошди. Айниқса, Хитой, Саудия Арабистони, Туркия, Жанубий Корея, Франция, БАА, Қатар ва бошқа давлатлар билан саноат, тиббиёт, инфратузилма ва туризм йўналишларида ҳамкорлик ривожланмоқда. АТ соҳада эса компаниялар сони 69 тадан 139 тага, хорижий компаниялар 4 тадан 49 тага етди, экспорт ҳажми эса 22,7 миллион долларга ошди.

Тинчлик ва барқарор ривожланишнинг энг муҳим шарти маънавий уйғониш ва илм-фан тараққиётидир. “Беш миллион сунъий интеллект етакчиси” дастурида Фарғона етакчилик қилаётгани, юқори малакали кадрлар тайёрланаётгани вилоятни рақамли трансформация марказига айлантирмоқда.

Шу билан бирга, “Бурҳониддин Марғиноний” илмий-маърифий ва туризм мажмуаси, Қўқон адабий муҳити, аския санъати маркази ва зиёрат, экотуризм лойиҳалари орқали иқтисодий ўсишга чуқур маънавий мазмун қўшилмоқда.

Бугун Фарғона тинчлик, маънавий юксалиш ва иқтисодий қудратнинг уйғунлашган намунаси сифатида Марказий Осиёга илҳом бермоқда. Бу муваффақиятлар асосида халқимизнинг тинчликсеварлиги ва фидокорона меҳнати ётади. Халқаро рейтинглар бизга катта ишонч бағишласа-да, олдимизда янги масъулиятлар турибди.

Баҳодиржон ШЕРМУҲАММАДОВ,

Фарғона давлат университети ректори