Бош прокуратура ҳузуридаги Департаментнинг Фарғона вилояти бошқармаси томонидан ўтказилган терговга қадар текширувда аниқланишича, фуқаролар М.Х., М.Х. ва К.И. ўзаро тил бириктириб, “Telegram” тармоғида турли номлардаги гуруҳларни ташкил этган.
Улар мазкур гуруҳлар орқали 7 та МЧЖга тегишли харид чеклари учун жисмоний шахсларга 1 фоизли, ижтимоий ҳимоя реестрига киритилган шахсларга эса 12 фоизли кэшбек суммаларини онлайн тарзда сотиш билан шуғулланган.
Текширув давомида ушбу МЧЖлар томонидан амалда ҳеч қандай молиявий операциялар амалга оширилмаган бўлса-да, 3,3 трлн сўмлик товар ва хизматлар харид қилингани ҳақида сохта электрон ҳисоб-фактуралар расмийлаштирилгани маълум бўлди. Шунингдек, савдодан тушган маблағлар онлайн назорат-касса машиналари орқали кирим қилингани кўрсатилиб, фуқароларга харид чеклари тарқатилган.
Натижада 211 минг 584 нафар фуқарога “Soliq Mobile” иловаси орқали 28,5 млрд сўм кэшбек ҳисобланган. Унинг 3,2 млрд сўми тўлаб берилган бўлиб, мазкур маблағлар бюджет маблағларини ўзлаштириш ёки растрата қилиш йўли билан талон-торож қилингани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатлар, штамплар, муҳрлар, бланкаларни қалбакилаштириш ва улардан фойдаланиш) билан жиноят иши қўзғатилиб, тергов ҳаракатлари олиб борилмоқда.
