Ўзбекистон Республикаси Президенти Шавкат Мирзиёев ва Ўмон Султони Ҳайсам бин Ториқ Ол Саид томонидан икки мамлакат ўртасида инвестициявий ва иқтисодий ҳамкорликни кенгайтиришга қаратилаётган эътибор доирасида энергетика соҳасида яна бир муҳим келишувга эришилди.

Ўзбекистон Республикаси Энергетика вазирлиги, Инвестициялар, саноат ва савдо вазирлиги, Ўмон Султонлигининг “Voltamp Energy SAOG” компанияси ҳамда маҳаллий “UET Construction” компанияси ўртасида Фарғона вилоятида 500 МВт қувватли қуёш фотоэлектр станциясини барпо этиш лойиҳасини биргаликда ривожлантириш тўғрисидаги келишув (JDA) имзоланди.

Мазкур келишув лойиҳани ҳамкорликда ишлаб чиқиш ва уни амалга оширишга тайёргарлик кўришни назарда тутади. Лойиҳа доирасида 350 млн АҚШ доллари миқдорида тўғридан-тўғри инвестиция жалб этиш режалаштирилган.

Станция ишга туширилгач, йилига 1 млрд кВт·соат “яшил” энергия ишлаб чиқариш ва 250 млн куб метр табиий газни тежаш имконияти яратилади.

Айни пайтда “Voltamp Energy SAOG” компанияси мутахассислари лойиҳа учун мўлжалланган ҳудудни ўрганиб, молиявий моделини ишлаб чиқмоқда. Ушбу ишларни қисқа муддатда якунлаб, тижорий таклиф тақдим этиш режалаштирилган.

Шунингдек, “Вольтамп” компаниясининг “Технокабел Гроуп” билан ҳамкорликда трансформаторлар учун махсус ўтказгичлар ишлаб чиқаришни йўлга қўйиш, “Nura Group” билан эса Тошкент вилоятининг Оҳангарон туманида юқори кучланишли трансформаторлар ишлаб чиқарувчи янги завод қуриш бўйича ҳам келишувларга эришилди.

Ушбу лойиҳалар мамлакатимизда қайта тикланувчи энергия манбаларини ривожлантириш, электротехника маҳсулотлари ишлаб чиқаришни маҳаллийлаштириш, замонавий технологияларни жалб этиш ҳамда янги иш ўринлари яратишга хизмат қилади.