Бу борада интеллектуал лойиҳалар ва билим майдонлари ёш давлат хизматчиларининг касбий ва шахсий компетенцияларини ривожлантиришнинг муҳим воситаси бўлиб хизмат қилмоқда.
Хусусан, “Заковат” интеллектуал ўйини ёшларда мантиқий фикрлаш, тезкор таҳлил қилиш, жамоа билан ишлаш, стрессли вазиятларда тўғри қарор қабул қилиш, мулоқот ва лидерлик кўникмаларини шакллантиришда муҳим аҳамият касб этади. Бу эса замонавий давлат хизматчиси учун зарур бўлган профессионализм, натижадорлик ва масъулият каби фазилатларни мустаҳкамлашга хизмат қилади.
Шу мақсадда Фарғона вилоятида “Ёшлар ойлиги доирасида ҳамда 23 июнь — Давлат хизмати кунига бағишланган Фарғона вилояти ҳокими кубоги учун “Заковат” интеллектуал ўйини бўлиб ўтди.
Фарғона шаҳридаги Фарғона экспо марказида ташкил этилган интеллектуал беллашувда вилоятдаги барча туман ва шаҳар ҳокимликлари, давлат органлари ҳамда ташкилотларида фаолият юритаётган 30 ёшгача бўлган давлат хизматчиларидан иборат 60 та жамоа иштирок этди. Мусобақа Фарғона вилояти ҳокимлиги, Бошқарув самарадорлиги агентлигининг Фарғона вилояти филиали ҳамда Ёшлар ишлари агентлиги Фарғона вилояти бошқармаси ҳамкорлигида ташкил этилди.
Беллашув давомида иштирокчилар турли соҳаларга оид саволлар орқали ўз билимлари ва интеллектуал салоҳиятини синовдан ўтказдилар. Шу билан бирга, улар маълумотларни тезкор таҳлил қилиш, чекланган вақтда қарор қабул қилиш, жамоавий ҳамкорликни йўлга қўйиш ва мураккаб вазиятларда самарали ишлаш каби кўникмаларини ҳам намоён этдилар.
— Бугунги давлат хизматчиси нафақат ўз соҳасини яхши билиши, балки рақамли фикрлаш, стратегик ёндашув, когнитив мослашувчанлик ва эмоционал интеллект каби компетенцияларга ҳам эга бўлиши зарур. Интеллектуал ўйинлар ана шу сифатларни ривожлантириш учун амалий майдон вазифасини ўтайди, — дейди Бошқарув самарадорлиги агентлигининг Фарғона вилояти филиали раҳбари Аҳаджон Акбаров. —Мазкур интеллектуал лойиҳа Ўзбекистон Республикаси Президенти томонидан илгари сурилаётган ёшларни қўллаб-қувватлаш, китобхонлик маданиятини ривожлантириш, интеллектуал салоҳиятни юксалтириш ва давлат хизмати учун рақобатбардош кадрлар захирасини шакллантиришга қаратилган ислоҳотларнинг амалий ифодаси бўлди.
Қизғин ва муросасиз кечган беллашувлар якунига кўра, Ижтимоий ҳимоя миллий агентлигининг Фарғона вилояти бошқармаси жамоаси ғолибликни қўлга киритиб, 1-ўрин соҳиби бўлди. Ўзбекистон тумани ҳокимлиги жамоаси 2-ўринни, Фарғона шаҳар ҳокимлиги жамоаси эса 3-ўринни эгаллади.
Тадбир якунида ғолиб ва совриндорларга Фарғона вилояти ҳокимининг кубоги, дипломлар ҳамда совғалар тантанали равишда топширилди.
