Маълум қилинишича, мазкур майдонга 10 апрель куни чигит экилган. Ғўза парвариши ва агротехник тадбирлар тегишли тавсиялар асосида амалга оширилган. Далага 20–21 июль кунлари этефон препарати билан ишлов берилган. Фермер хўжалиги вакилининг айтишича, ишлов жараёнида бир литр шакар ва бир литр этефон препарати қўлланган.

Ишлов берилганидан бир ҳафта — 10 кун ўтиб ўтказилган ўлчовда бир чаноқ пахтанинг ўртача вазни 7 грамм атрофида бўлган. Орадан 20 кун ўтгач эса бу кўрсаткич 9–9,5 граммга етган.

Фермер хўжалиги вакили аввалги йилларда мазкур даланинг пахтасида бир чаноқ вазни 5 граммдан ошмаганини, жорий мавсумда эса айрим чаноқлар 8–9 грамм, ҳатто 10 граммгача келаётганини билдирди.

Тажрибада ғўза баргларида пишиш ва қариш жараёни бошлангани кузатилган. Тажриба иштирокчиларининг таъкидлашича, баргда тўпланган озуқа элементлари ва шакарнинг ҳосил элементлари ҳамда кўсакларга ўтиши учун баргнинг қариши муҳим аҳамиятга эга.

Шу муносабат билан этефонни дефолиант билан бирга қўллаш масаласига ҳам тўхталиб ўтилди. Тажриба иштирокчиларининг фикрича, дефолиант барг бандидан узилишига сабаб бўлганда, баргда тўпланган озуқа моддалари ҳам барг билан бирга ерга тушиб кетиши мумкин. Шунинг учун мазкур тажрибада этефонни алоҳида қўллашга эътибор қаратилган.

Далада пахтанинг очилиши ҳам кузатилди. Айрим ўсимликларда 80 фоизгача пахта очилгани, чаноқлар эса аввалги йиллардаги каби чирт этиб эмас, балки тўлиқ ва «лўппи-лўппи» очилаётгани қайд этилди.

Фермер хўжалиги вакили жорий мавсумда 80 центнер ҳосил олишни кутаётганини билдирди.

Тажриба давомида пахтанинг вазни яна бир бор ўлчанди. Жумладан, уч чаноқ пахтанинг аввалги ўлчовдаги вазни 22 грамм бўлган бўлса, бу сафар худди шу миқдордаги пахта 29,6 грамм тош босди.

Фермернинг таъкидлашича, этефон қўлланилганидан кейин кўсакларда зарарланиш кузатилмаган. Айниқса, ўсимликнинг юқори қисмидаги чаноқлар ҳам тўлиқ очилиб, аввалги йиллардагига нисбатан юқори вазн кўрсатмоқда.

Тажриба иштирокчилари ушбу натижалар асосида этефонни дефолиант билан аралаштирмасдан, алоҳида қўллаш бўйича тавсия берди. Уларга кўра, асосий мақсад баргда тўпланган озуқа ва шакарни сақлаб қолиб, уни кўсак ва ҳосилга йўналтиришдан иборат.