Ўзбекистон Украина билан учрашув тугашидан олдин чемпионликни математик жиҳатдан кафолатлади. Чунки Ҳиндистон сўнгги турда Венгрия билан 2:2 дуранг ўйнади. Ўзбекистон 10 турдан кейин Ҳиндистондан бир очко олдинда эди: 18 га 17.
Бу йўл осон бўлмади. Ўзбекистон мусобақанинг дастлабки 7 турининг барчасида ғалаба қозонди. Ҳал қилувчи баҳсларда Ҳиндистон устидан 2.5:1.5, Хитой устидан 3:1 ҳисобида ғалаба қозонилди. 8-турда Германия ғалабали серияни тўхтатди, аммо жамоамиз дарҳол ўзини тиклади: 9-турда турнирнинг биринчи рақамли сараланган жамоаси — АҚШ мағлуб этилди, 10-турда эса Арманистон 3.5:0.5 ҳисобида таслим этилди.
Ва ниҳоят — Украинага қарши сўнгги ғалаба олтин медал масаласини ҳал қилди.
Ўзбекистон таркиби:
Жавоҳир Синдаров
Нодирбек Абдусатторов
Нодирбек Якуббоев
Шамсиддин Воҳидов
Муҳиддин Мадаминов
Жамоа сардори — собиқ жаҳон чемпиони Рустам Қосимжонов. Ушбу таркибдаги тўрт нафар шахматчи 2022 йилда Ченнаи Олимпиадасида олтин медални қўлга киритган жамоада ҳам ўйнаган.
Ўзбекистон шахматининг сўнгги уч Олимпиададаги натижаси эса алоҳида эътиборга лойиқ:
2022, Ченнаи — ОЛТИН
2024, Будапешт — БРОНЗА
2026, Самарқанд — ОЛТИН
Демак, Ўзбекистон кетма-кет учта Шахмат олимпиадасини медалсиз тарк этмади ва тўрт йил ичида иккинчи бор Опен бўлимида жаҳоннинг энг кучли терма жамоаси бўлди.
Энг ўзига хос жиҳати — бу сафарги чемпионлик ўз уйимизда, Самарқандда қўлга киритилди.
2022 йилда Ўзбекистоннинг Олимпиададаги олтин медалини тасодиф ёки бир марталик муваффақият деб баҳолаганлар ҳам бор эди. Аммо 2026 йилда жамоамиз бутун турнир давомида кучли ва ишончли ўйин намойиш этиб, яна шоҳсупага кўтарилди.
Бу сафар йигитларимиз фақат чемпион бўлибгина қолмай, 2022 йилдаги олтин тасодиф бўлмаганини ва Ўзбекистон бугун дунёнинг энг кучли шахмат терма жамоаси эканини амалда исботлади.
Чемпионларимизни ва бутун Ўзбекистон халқини ушбу тарихий ғалаба билан чин қалбдан табриклаймиз!
