Халқаро университет спорти федерацияси (FISU) президенти Леонз Эдернинг Ўзбекистонга ташрифи муносабати билан, мамлакатимизда шаклланаётган талабалар спортини ривожлантириш модели, унинг ташкилий механизмлари ва амалий натижаларини ўрганиш, шунингдек, Ўзбекистоннинг илғор тажрибасини бутунжаҳон спорт ҳамжамиятига танитиш ва бошқа давлатларда қўллаш мақсадида 2026 йил 29 сентябрдан 2 октабргача I Марказий Осиё талабалар спорти халқаро форуми бўлиб ўтади.
Форум доирасида Марказий Осиё мамлакатлари ҳамда халқаро университет спорти ташкилотлари вакиллари иштирокида талабалар спортини ривожлантириш, соҳадаги долзарб масалаларни муҳокама қилиш ва ўзаро ҳамкорлик истиқболларини белгилашга қаратилган учрашув ҳамда тадбирлар ташкил этилади.
Тадбирда Халқаро университет спорти федерацияси (ФИСУ) раҳбарияти, шунингдек, Қозоғистон, Қирғизистон, Мўғулистон, Тожикистон ва Туркманистон талабалар спорти федерациялари вакиллари иштирок этиши режалаштирилган.
Шунингдек, Леонз Эдер ташриф доирасида I Марказий Осиё талабалар спорти халқаро форуми ҳамда талабалар ўртасида ўтказиладиган “Беш ташаббус” олимпиадаси спорт мусобақаларининг тантанали очилиш маросимларида иштирок этади.
