Ўзгидромет прогнозларига кўра, ноябрь ойининг биринчи ўн кунлигида кечалари ҳаво ҳарорати 5–10 даража илиқ, кундуз кунлари эса 17–22 даража илиқ бўлади.
Ойнинг иккинчи ва учинчи ўн кунликларида ҳарорат фони пасайиши кутилмоқда. Бу даврда кечалари ҳаво ҳарорати 3–8 даража илиқдан 2 даража совуқ ва 3 даража илиққача, кундуз кунлари эса 15–20 даража илиқдан 5–10 даража илиққача ўзгариб туриши мумкин.
Ноябрь ойида Ўзбекистоннинг айрим ҳудудларида ёмғир ёғиши прогноз қилинмоқда. Ҳарорат пасайган даврларда ёмғир қисқа муддатга қорга айланиши ҳам мумкин. Тоғли ҳудудларда эса биринчи қор қоплами шаклланиши кутилмоқда.
Ойлик ёғингарчилик миқдори республика ҳудудининг катта қисмида меъёр атрофида, айрим жойларда эса меъёрдан кам бўлиши прогноз қилинган.
Ноябрь куз фаслининг сўнгги ойи бўлиб, бу даврда ҳаво ҳарорати октябрь ойига нисбатан сезиларли даражада пасаяди. Иқлимий маълумотларга кўра, ноябрь ойида ўртача ҳарорат октябрга нисбатан 6–7 даражага, шимолий ва чўл ҳудудларида эса 8–9 даражага паст бўлади.
Умуман, кириб келаётган ноябрь ойи Ўзбекистонда куздан қишга ўтиш даври бўлиб, ҳароратнинг аста-секин пасайиши, ёмғирли кунларнинг кўпайиши ва айрим ҳудудларда биринчи қор ёғиши билан характерланади.
