Тошкент вилояти Экология ва иқлим ўзгариши бош бошқармаси Экологик полиция ходимлари томонидан ўтказилган рейд тадбири Янгийўл туманидаги «Пахта» маҳалла фуқаролар йиғини ҳудудида, Тошкент давлат ўрмон хўжалигига қарашли Янгийўл ўрмон бўлимида ташкил этилди.
Тадбир давомида ўрмон ҳудудининг бир нечта жойида дарахтлар кесилгани аниқланди. Мутахассислар ҳар бир ҳолат бўйича дарахтларнинг айланаси ва диаметрини ўлчаб, турини аниқлаш ишларини олиб бормоқда. Шунингдек, табиатга етказилган зарар миқдори ҳисобланади.
Рейд давомида ўрмон ҳудудидаги айрим дарахтларда қуриш ва касалланиш ҳолатлари ҳам кузатилган. Мутахассислар буни санитария ишлари ўз вақтида амалга оширилмагани билан боғламоқда. Таъкидланишича, касалланган дарахтларга ўз вақтида санитария ишлови берилмаса, ўрмоннинг айрим дарахтлари йўқолиб кетиши мумкин.
Аниқланган ҳолатлар юзасидан ўрганиш ишлари давом этмоқда. Дарахтларнинг тури ва етказилган зарар миқдори аниқланганидан сўнг, ҳолатга ҳуқуқий баҳо берилади.