Мамлакатимиз етакчисининг Марғилон шаҳрига ташрифи фарғоналиклар қалбида ана шундай масрур туйғуларни уйғотди. Уларнинг шодиёнаси, қувончи бутун мамлакат бўйлаб кенг қулоч ёзди. Бу бежиз эмас, албатта. Зеро, давлатимиз раҳбарининг галдаги ташрифи Фарғон вилоятининг ижтимоий-иқтисодий, маданий-маърифий ҳаётида ислоҳотларнинг янги даврини бошлаб берди. Буни янги очилган туризм мажмуаси мисолида ҳам кўришимиз мумкин.
Марғилон шаҳридаги “Бурҳониддин Марғиноний” илмий-маърифий ва туризм мажмуаси. Янги бунёд этилган мажмуа эртакларда айтилиб, китобларда ёзилган афсонавий шаҳарни ёдга солади. Унинг тантанали очилиш маросимига йиғилганлар қалбидаги фахрни бола қалбидай тоза нигоҳлардан пайқаб олиш мушкул эмас. Катта издиҳомга, бўлажак концерт томошасига кираётганлар навбат қолиб, кўрган-кечирганлари ҳақида сўзлашади. “Отабек ва Кумуш уйи” музейини кўрдингизми?” “Ҳа, эшикдан ичкарига ҳатлашингиз ҳамон “Ўткан кунлар”га тушиб қолгандай бўласиз экан”. “Ўзиям ҳар бир нақшигача эътибор бериб, жуда зўр қилиб қуришибди. Энди дунёнинг тўрт томонидан турстлар оқиб келаверади-да”.
Гап-гапга уланиб, мажмуа ҳудудидаги анфитеатрга қандай кириб қолганимизни сезмаймиз. Катта издиҳомда кишини ўзага хос салобат босади. Мажмуасининг тантанали очилиш маросимида Президент Шавкат Мирзиёев иштирок этиб, нутқ сўзлар экан йиғилганлар қувонч ва ҳаяжон ила бир-бирига маъноли кўз ташлайди. Бу қарашда: “Эшитяпсизми, Фарғонамиз янада гуллаб, тараққий этади”, деган маъно мужассам. Шу ўринда халқимизнинг оққан дарё оқаверади, деган нақли ёдга тушади.
Шу ўринда Марғилон шаҳрига берилган улуғ мақом – “Маърифат аҳлининг ватани”, ибораси ҳақида тўхталиб ўтиш зарур. Бу кўҳна кент азалдан ҳунармандлар, илм-маърифат соҳибларининг ватани бўлиб келган. Юртимиздаги қадим тамаддунлардан бири айнан шу ерда шаклланган. Буни исботлашнинг жуда оддий йўли бор. Яъни шаҳарда қадимдан ҳунармандлик ривожланган. Масалан, биргина ироқи дўппининг нақшлари нафақат бадиий диднинг юксак намунаси, балки ўзида рамзларни жамлаган маданий мерос ҳамдир. Бундай дурдонага асос солиш учун жамиятда илм-маърифат юксак даражага чиқиши, жамиятда тинчлик, аҳиллик ҳукм суриши, халқ фаровон яшаши керак бўлади.
Бугун Марғилоннинг ана шу қадимий қувват, илмий ва маърифий қудрати қайта тикланмоқда. Бунга албатта, юртимиздаги кенг кўламли ислоҳотлар сабаб. Негаки, мамлакат аввал иқтисодий юксалишга юз тутади. Сўнг жамиятда маданий-маърифий юксалиш янада жадаллашади. Шу маънода “Бурҳониддин Марғиноний” илмий-маърифий ва туризм мажмуасининг очилиш маросими катта тантанага айлангани бежиз эмас. Янги Ўзбекистон нафаси сабаб Марғилондай қадим шаҳарнинг қадимий қудрати қайта уйғона бошлади. Фарғоналиклар буни теран ҳис этиб, мажмуа очилишини катта тантана билан қарши олди. Янгиланишларни ўз ҳаёти мисолида кўриб, эртанги кунга ишонч билан яшаётган инсонларга бундай байрамлар, албатта ярашади.
Юқори савияда ташкил этилган концерт дастури халқимиз ягона ватан бўлиб бирлашаётганига яна бир карра гувоҳ бўлдик. Дастур давомида фольклор-этнографик жамоалар, санъаткорлар ва истеъдодли ижрочилар чиқишлар қилди. Юртимизнинг турли ҳудудларига хос сурхонча, бухороча ва қорақалпоқча каби рақслар намойиш этилди. Фарғоналиклар ушбу чиқишларнинг барчасини кўтаринки кайфият, байрамона шукуҳ билан қарши олди.
Инсон ҳаётидан рози эканини доим ҳам сўз билан изҳор қилавермайди. Чунки, яхши туйғуларимизни баён этишга кўпинча қийналамиз. Нари борса, хурсандман-да, деймиз овозимизни баралла қўйиб. Лекин бу қувончнинг аниқ тасвири йўқ дегани эмас. Инсон хурсандчилигини унинг нигоҳидан, биргина қарашидан билиб олиш мумкин. Афсонавий шаҳарчанинг очилиш маросимида Водий аҳлининг юз-кўзида ана шундай севинч, ҳаётдан розилик ифодалари эгаллади.
Тан олиш керак, иқтисоди мустаҳкам бўлган жамиятлар билим олишга, ҳунар ўрганиб, янги имкониятлар эшигини очишга кўпроқ рағбат сезади. Сўнгги йилларда миллий меъморчилик ечимлари асосида, тарихий ва замонавий анъаналарни уйғунлаштирган йирик туризм мажмуалари барпо этилмоқда. Самарқандда “Буюк ипак йўли” ва Имом Бухорий мажмуалари, Хоразмда “Арда Хива” халқаро туризм маркази ишга туширилди. Тошкентда очилган Ислом цивилизацияси маркази ҳам бу борада улкан қадам бўлди.
Буларнинг барчаси мамлакатимизда бошланган янгиланишлар жараёни тўғри ва изчил давом этаётганидан далолат. Эътиборлиси, ушбу мажмуалар нафақат маданий марказ, балки сайёҳлик ривожига ҳисса қўшадиган иқтисодий қувват ҳам ҳисобланади.
Тарих зарварағига катта ҳарфлар билан битилган ушбу кунни Водий аҳли катта шодиёна билан қарши олгани ҳам бежиз эмас. Ахир бундай янгиланишлар мамлакат эртасига кафолат, келжак авлоднинг бахтли ҳаёти учун равон йўл солинаётганидан далолатдир. Бундай сабаб эса барчага бирдек қувон улашиши табиий.
“Бурҳониддин Марғиноний” илмий-маърифий ва туризм мажмуасининг тантанали очилиш маросими сўнгида Марғилон осмонини ранг-баранг ва ёрқин мушаклар ёритди. Улар мард ва танти, меҳмондўст ва ҳаётсевар фарғоналикларнинг қувончи, ёрқин орзу ва интилишларнинг тимсоли сифатида намоён бўлди.
Боборавшан ҒОЗИДДИНОВ,
“Янги Ўзбекистон” мухбири
