Институт ректори, профессор Ш.Т. Ҳасанов ҳамда Ўқув-методик таъминот бўлими бошлиғи С.А. Мамасолиев 2026 йил 18–21 ноябрь кунлари хизмат сафари билан Японияда бўлди.

Ташрифнинг биринчи куни Токио қишлоқ хўжалиги ва технологиялар университети профессори Ёшико Кавабата билан учрашув ўтказилди. Унда JICA кўмагида институтда таҳсил олаётган япониялик талабалар сонини ошириш, қуритилган хурмони истеъмолчилар учун қулай ва бозорбоп шаклда тайёрлаш, шунингдек, қўшма илмий лойиҳаларни ишлаб чиқиш масалалари муҳокама қилинди.

Учрашувлар давомида 2027 йил август–декабрь ойларида институтда фаолият юритиши режалаштирилган тадқиқотчи Сузуки Кентонинг илмий-амалий ишлари режаси ҳам кўриб чиқилди. У Самарқанд вилоятидаги фермер ва деҳқон хўжаликларида ўсимлик ҳамда мевали дарахтлар қолдиқларидан биокўмир тайёрлаш бўйича тажрибалар ўтказиш, фермерлар учун амалий семинарлар ташкил этиш ва сўровномалар ўтказишни режалаштирган.

Шунингдек, Токио қишлоқ хўжалиги ва технологиялар университетининг янги сайланган раҳбарияти — стратегик ҳамкорлик бўйича вице-президент, профессор Акинори Яманака ҳамда университет президенти Нобухуми Накамура билан учрашувлар ташкил этилди.

Музокараларда 2027 йилда институтга юборилиши режалаштирилган волонтёрлар фаолияти, қишлоқ хўжалиги муҳандислиги соҳасида таълим ва илмий тадқиқотлар, профессор-ўқитувчилар, ёш тадқиқотчилар ва докторантлар алмашинувини кенгайтириш масалалари муҳокама қилинди. Шунингдек, қишлоқ хўжалиги фаолиятини энергия ишлаб чиқариш билан уйғунлаштирувчи агровольтаика йўналишида қўшма ташаббусларни амалга ошириш юзасидан фикр алмашилди.

Ташрифнинг муҳим воқеаларидан бири Токио қишлоқ хўжалиги ва технологиялар университетида «Барқарор инновацион ривожланишда халқаро ҳамкорлик: Гана ва Ўзбекистон мисолида» мавзусида ўтказилган халқаро симпозиум бўлди. Унда институт ректори, профессор Ш.Т. Ҳасанов маъруза билан иштирок этиб, икки мамлакат ўртасидаги илмий-амалий ҳамкорлик истиқболлари, қуритилган хурмо етиштириш ва қайта ишлаш орқали деҳқонлар даромадини ошириш имкониятлари ҳамда келгуси режалар ҳақида тақдимот қилди.

Симпозиумда Ўзбекистоннинг Япониядаги элчиси вазифасини бажарувчи Равшанбек Дўсчанов бошчилигидаги элчихона вакиллари, Сидзуока амалий қишлоқ хўжалиги университети ректори Рио Фунада, шунингдек, қатор олий таълим муассасалари профессор-ўқитувчилари ва бизнес вакиллари қатнашди.

Ташриф якунида қўшма илмий лойиҳаларни ишлаб чиқиш, профессор-ўқитувчилар ва талабалар академик мобиллигини ривожлантириш, халқаро семинар ҳамда конференциялар ташкил этиш бўйича келишувларга эришилди.

Мазкур ташриф Самарқанд агроинновациялар ва тадқиқотлар институтининг халқаро алоқаларини мустаҳкамлаш, илғор хорижий тажрибаларни таълим ва илмий тадқиқотларга татбиқ этишга қаратилган муҳим қадам бўлди.