Имом Бухорий мажмуаси 2026 йил 19 март куни Ўзбекистон Республикаси Президенти Шавкат Мирзиёев иштирокида тантанали равишда очилган эди. Кенг кўламли реконструкция ишлари натижасида мажмуа замонавий ва миллий меъморчилик анъаналарига уйғун қиёфа касб этди.

Бугунги кунда мажмуа ҳудуди 45 гектарни ташкил этади. Унинг таркибида Имом Бухорий ҳазратларининг сағанаси, 10 минг кишилик масжид, 154 устунли миллий услубдаги айвонлар, 14 та мовий гумбаз, 75 метрлик 4 та минора ҳамда 9 павильондан иборат инновацион музей фаолият юритмоқда. Музейда буюк алломанинг ҳаёти, илмий мероси ва ислом оламидаги ўрни кенг ёритилган.

Мажмуа нафақат зиёрат маскани, балки халқимизнинг бой маънавий мероси, миллий меъморчилик анъаналари ва ислом цивилизациясидаги муносиб ўрнини намоён этувчи муҳим маданий объект ҳисобланади. Уни бунёд этиш жараёнида катта маблағ, хориждан олиб келинган қимматбаҳо мармарлар, ноёб қурилиш материаллари ва замонавий технологиялар жалб этилган.

Шу боис ушбу қутлуғ масканга ташриф буюраётган фуқаролардан зиёратгоҳ маданиятига риоя қилиш, ҳудуддаги тозалик ва тартибни сақлаш, бинолар, устунлар, айвонлар, музей экспозициялари ҳамда бошқа объектларга эҳтиёткорлик билан муносабатда бўлиш сўралмоқда.

Афсуски, айрим ҳолатларда баъзи ташриф буюрувчилар томонидан мажмуа ҳудудидаги қимматбаҳо материаллар ва иншоотларга нисбатан беписанд муносабат ҳолатлари кузатилаётгани қайд этилди. Мутасаддилар бундай хатти-ҳаракатлар мажмуанинг ташқи кўриниши ва унинг узоқ йиллар давомида асл ҳолича сақланишига салбий таъсир кўрсатиши мумкинлигини таъкидлади.

Масъуллар барча фуқаролар ва зиёратчиларни ушбу муқаддас масканга ҳурмат билан муносабатда бўлишга, тозалик ва озодаликка амал қилишга ҳамда мажмуани келажак авлодларга муносиб ҳолатда етказиш йўлида масъулият билан ёндашишга чақирди.