Маълум қилинишича, ҳодиса 30 июнь куни соат тахминан 05:10 да содир бўлган. Дастлабки тергов маълумотларига кўра, «Kia» русумли автомобилни вояга етмаган шахс бошқарган.

Тўқнашув оқибатида «Lacetti» автомобилида бўлган икки нафар фуқаро воқеа жойида ҳалок бўлган. Яна уч киши, жумладан, икки нафар ёш бола турли даражада тан жароҳати олиб, шифохонага ётқизилган.

Ҳодисада иштирок этган вояга етмаган ҳайдовчи ўз қилмишидан пушаймон эканини билдириб, ҳалок бўлганларнинг яқинлари ва ота-онасидан кечирим сўраган. Унинг айтишича, отасининг автомобилини рухсатсиз олиб чиққан ва йўл-транспорт ҳодисасига сабабчи бўлган.

Шунингдек, вояга етмаганнинг ота-онаси ҳам жабрланганлардан узр сўраб, қонун доирасида кўриладиган ҳар қандай чорага тайёр эканини билдирган.

Ҳолат юзасидан маҳалла фаоллари, таълим муассасаси педагоглари ва ўқувчилари иштирокида жамоатчилик муҳокамаси ҳам ўтказилган.

Айни пайтда Тошкент шаҳар ИИББ ҳузуридаги Тергов бошқармаси томонидан дастлабки тергов ҳаракатлари давом эттирилмоқда.

Ички ишлар органлари ота-оналарга мурожаат қилиб, вояга етмаганларнинг транспорт воситасини бошқариши оғир оқибатларга олиб келиши мумкинлигини эслатди ҳамда фарзандлар устидан назоратни кучайтиришга чақирди.