Унда “Ўзбекистон темир йўллари” акциядорлик жамияти раҳбарияти, соҳа мутахассислари, Корея Республикасининг Ўзбекистондаги Фавқулодда ва мухтор элчиси, хорижий делегациялар ҳамда оммавий ахборот воситалари вакиллари иштирок этди.

Поезд давлат раҳбари ташаббуси билан мамлакатимизга олиб келинган бўлиб, темир йўл соҳасида олиб борилаётган кенг кўламли ислоҳотларнинг амалий ифодаси ҳисобланади. Тадбир давомида Ўзбекистон ва Жанубий Корея ўртасидаги самарали ҳамкорлик, келгуси истиқболли лойиҳалар ва транспорт инфратузилмасини янада ривожлантириш масалаларига алоҳида урғу берилди.

Шундан сўнг медиа вакиллари, темир йўл фахрийлари, масъул ходимлар ҳамда йўловчилар бирга тарихий илк Хива сафарини бошлаб беришди.

Асрлар давомида карвонлар юрган, ҳафталаб босиб ўтилган масофалар энди бир неча соатга қисқарди. Илгарилари Тошкентдан Хивагача бўлган 1022 километр масофа камида 14 соат вақт олар эди. Энди эса соатига 250 километр тезликда ҳаракатланувчи ушбу замонавий поезд орқали манзилга 7,5 соатда етиб бориш мумкин.

Поезддаги шароитлар замонавий талабларга тўлиқ жавоб беради. Вагонларда кузатув камералари, қулай бурилувчи ўриндиқлар, ахборот экранлари мавжуд, уларда ҳаракат харитаси ва тезлик кўрсаткичлари доимий равишда акс этиб туради.

Йўлдаги илк йирик манзил — Самарқанд шаҳри бўлди. Қадимий ва ҳамиша гавжум бу шаҳарда поезд тантанали тарзда кутиб олинди. Темир йўл бекатида миллий оҳанглар янграб, байрамона муҳит ҳукм сурди. Айрим йўловчилар шу ерда тушиб қолар экан, бошқалар саёҳатни давом эттирди.

Поездда суҳбатлашган йўловчилардан бири — Индира Қодирова шундай дейди:

— “Бу даражадаги қулайликни очиғи кутмаган эдим. Илгари узоқ масофа чарчатар эди. Энди вақт ҳам тежалади, сафар ҳам ўзгача кечади деб ишонаман.”

Шунингдек, 13 ёшли йўловчи Отамурод Райимбоев бундай поездга илк маротаба чиққанини алоҳида таъкидлади. “Жуда ҳам қулай экан” дея, ўзгача хурсандлигини айтиб, бизга миллий Хоразм қўшиғини куйлаб, янада кўтаринки руҳ бағишлади.

Кейинги манзил — Бухоро шаҳри. Бу ерда ҳам миллий қўшиқлар, рақслар ва самимий муҳит меҳмонларда унутилмас таассурот бағишлади. Йўловчилар алмашинуви эса янги қатнов ички ва ташқи туризм ривожига хизмат қилаётганининг ифодаси бўлди.

Йўл давомида биз билан суҳбатлашган темир йўл фахрийси Ҳасан Маҳмудов ўз фикрларини қуйидагича билдирди:

— “Мен бу соҳада кўп йил ишлаганман. Бугунги кундаги ўзгаришларни кўриб, ўзгача қувондим ва фахирландим очиғи. Бу поезд — нафақат техника, балки юртимиз тараққиётининг рамзи.”

Поезд Қизилқум чўлининг қумли ҳудудларидан ўтаётганда ҳам вагонлар ичида мутлақо чанг кирмайди. Чунки у қум бўронларига чидамли махсус тизимлар билан жиҳозланган. Энг муҳими — сафар чарчоғи деярли сезилмайди: силкинишларсиз, шовқинсиз. Эрталаб йўлга чиқиб, тушликка манзилга етиб келиш мумкин.

Йўлда Урганч бекатида ҳам қисқа тўхташ амалга оширилди ва ниҳоят, сафарнинг сўнгги манзили — қадимий ва бетакрор Хива шаҳрига етиб келдик. Бу ерда ҳам меҳмонлар байрамона кайфиятда кутиб олинди.

Маросим доирасида халқаро ҳамкорлик масалаларига ҳам алоҳида эътибор қаратилди. Жанубий Корея компанияси томонидан ишлаб чиқарилган ушбу поезд юқори технологиялар асосида яратилган бўлиб, Ўзбекистоннинг иқлим шароитига тўлиқ мослаштирилган.

Тадбирда Корея Республикасининг Ўзбекистондаги Фавқулодда ва мухтор элчиси Вон До Ён ҳам сўзга чиқиб, лойиҳани юқори баҳолади:

— “Бугунги мазмунли тадбирда иштирок этаётганимдан бағоят мамнунман. “Жалолиддин Мангуберди” тезюрар поезди бўйича шу кунга қадар Шавкат Мирзиёев жаноби олийлари ҳамда бир қатор юқори мартабали вакиллар синов сафарларида иштирок этиб, ушбу лойиҳа натижаларидан юксак мамнун эканликларини билдиришганидан хабардорман. Мен ҳам икки маротаба синов сафарида қатнашиш имконига эга бўлдим.

Шавкат Мирзиёев жанобларининг оқилона сиёсати туфайли мамлакатларимиз ўртасида транспорт соҳасидаги ҳамкорлик нафақат тезюрар поездлар йўналишида, балки замонавий темирйўл инфратузилмасини ривожлантириш, жумладан, тезюрар темирйўл линияларини барпо этиш йўналишида ҳам изчил ривожланиб бормоқда.

Хусусан, яқинда Тошкент–Самарқанд тезюрар темирйўл линиясини қуриш лойиҳаси бўйича техник-иқтисодий асослаш ишлари якунланди. Ишончим комилки, бундай ҳамкорликларимиз келгусида янада кенгайиб, амалий натижалар беришда давом этади.”

Маълумотларга кўра, 2023–2026 йилларда Жанубий Кореянинг “Hyundai Rotem” компаниясидан 6 та юқори тезликдаги поезд харид қилиниши режалаштирилган. Улардан биринчиси айнан шу — “Жалолиддин Мангуберди” поезди бўлиб, 7 вагондан иборат, 389 ўриндиққа эга ва узунлиги 175 метр.

Шунингдек, мазкур қатновни таъминлаш мақсадида “Бухоро — Урганч — Хива” йўналишининг 450 километр қисми электрлаштирилди, “Навоий — Бухоро” участкасининг янги линияси барпо этилди.

“Жалолиддин Мангуберди” поезди нафақат масофани қисқартирди, балки мамлакатнинг транспорт тизимида янги босқични бошлаб берди. Бу — тарих ва замонавийлик уйғунлиги, қулайлик ва тезликнинг бир нуқтада жамланган ифодасидир.

Хива — тирик тарих. Унга олиб борувчи янги темир йўл эса келажак сари ишончли қадамдир.

Зулхумор АКБАРОВА