Ваучер орқали фуқаролар касб ёки хорижий тил бўйича ўқув курсларида бир марта бепул таълим олиш имкониятига эга бўлади.

Ваучерни қуйидаги фуқаролар олиши мумкин:

  • ишсиз фуқаролар;
  • ижтимоий реестрга киритилган оила аъзолари;
  • расмий даромад манбаига эга бўлмаган фуқаролар.

Ваучерни қандай олиш мумкин?

Бунинг учун фуқаролар:

  • туман ёки шаҳар бандлик бўлимларига;
  • маҳалладаги ҳоким ёрдамчиларига мурожаат қилиши;
  • ёки ecosys.mehnat.uz платформаси орқали онлайн ариза бериши мумкин.

Ваучер тизимида иштирок этувчи таълим ташкилотларининг электрон реестри шакллантирилган. Фуқарога касб ёки хорижий тилни ўрганиш учун ваучердан бир марта фойдаланиш ҳуқуқи берилади.

Ўқиш сифати қандай назорат қилинади?

Ўқув жараёнида таълим сифати ва тингловчиларнинг давомати CRM дастури орқали автоматик назорат қилинади. Шунингдек, курсни тамомлаган фуқароларнинг кейинчалик ишга жойлашиш натижалари ҳам мониторинг қилинади.

Ўқув курси якунида ecosys.mehnat.uz платформасига жойлаштирилган тест топшириқлари асосида якуний имтиҳон ўтказилади.

Имтиҳонда камида 71 балл тўплаган тингловчи курсни муваффақиятли тамомлаган ҳисобланади ва унга белгиланган намунадаги сертификат берилади.

Шунингдек, ваучер тизимига янги касб ёки йўналишни киритиш масаласи вазирликда ташкил этилган ишчи гуруҳ томонидан кўриб чиқилади. Тасдиқланган йўналиш ecosys.mehnat.uz платформасига киритилиб, вазирликнинг расмий веб-сайтида эълон қилинади.

Касблар рўйхати билан ecosys.mehnat.uz платформаси орқали танишиш мумкин.