Президент Шавкат Мирзиёевнинг куни кеча Андижон вилоятига ташрифи давомида мазкур лойиҳаларни ишга тушириш ва уларнинг қурилишига старт берилган эди.
Шу муносабат билан Қурилиш ва уй-жой коммунал хўжалиги вазири Шерзод Ҳидоятов вилоятда фаолият юритаётган қурувчилар, тадбиркорлар, лойиҳа ва пудрат ташкилотлари вакиллари билан очиқ мулоқот ўтказди.
Учрашувда тадбиркорлар ўз фаолиятида дуч келаётган муаммоларни ўртага ташлаб, уларнинг ечими бўйича таклифларини билдирди.
Вазир инвестиция лойиҳаларини ўз вақтида ва сифатли амалга оширишда қурилиш ташкилотларининг масъулияти юқори эканини таъкидлади. Шунингдек, тадбиркорларга қулай шароит яратиш билан бирга, қурилишда сифат ва хавфсизлик талабларига қатъий риоя этиш зарурлиги қайд этилди.
«Тадбиркорлар билан очиқ мулоқот қилиш, уларнинг муаммоларини бевосита эшитиш ва амалий ечимлар топиш биз учун жуда муҳим. Вазирлик ҳар доим тадбиркорларга кўмакчи бўлишга тайёр», — деди Шерзод Ҳидоятов.
Вазирнинг таъкидлашича, қурилиш соҳасида инсон омилини минималлаштириш, жараёнларни шаффофлаштириш ва хизматларни рақамлаштириш вазирликнинг устувор вазифаларидан ҳисобланади.
Учрашув якунида тадбиркорлар томонидан билдирилган мурожаат ва таклифларни тегишли ташкилотлар билан ҳамкорликда ўрганиш ҳамда мавжуд муаммолар юзасидан амалий чоралар белгилашга келишиб олинди.
