Адлия вазирлиги Марказий банк бошқарувининг айрим идоравий норматив-ҳуқуқий ҳужжатларга қўшимчалар киритиш тўғрисидаги қарорини давлат рўйхатидан ўтказди. Ҳужжат 2026 йил 30 сентябрда 3948-сон билан рўйхатга олинган.
Янги талабларга кўра, банклар кредит рекламасида кредит бўйича мажбуриятларни бажармаслик истеъмолчи учун молиявий хатарларга олиб келиши мумкинлиги ҳақида огоҳлантириш бериши керак.
Бунда огоҳлантириш босма ва электрон реклама майдонининг, аудио ва видеореклама давомийлигининг камида 10 фоизини эгаллаши лозим.
Шунингдек, кредит шартномасининг биринчи саҳифасида, асосий матндан олдин, саҳифа юзасининг камида 30 фоизини эгаллайдиган огоҳлантириш ахбороти жойлаштирилиши белгиланди.
Бундан ташқари, истеъмолчини чалғитувчи деб топилган кредит маҳсулоти таклиф этилган ҳолатларда Марказий банк банкнинг айрим молиявий операцияларни амалга оширишини ёки инфратузилмасини кенгайтиришини олти ойгача чеклаши ёки тақиқлаши мумкин.
Қарор расмий эълон қилинган кундан эътиборан бир ой ўтгач кучга киради.
