Б.Т.ни ватанга қайтариш амалиёти Ўзбекистоннинг Новосибирск шаҳридаги Бош консулхонаси, Миграция агентлиги ҳамда Кемерово вилояти — Кузбассдаги ватандошлар миллий ташкилоти кўмагида амалга оширилди.

Ватандошимиз миллий авиакомпаниянинг Новосибирск — Тошкент йўналиши бўйича юртимизга олиб келинди. Тошкент халқаро аэропортида уни шифокорлар ва тез тиббий ёрдам машинаси кутиб олди. Бемор зарур тиббий ёрдамни кўрсатиш учун дарҳол Республика шошилинч тиббий ёрдам илмий марказига етказилди.

Б.Т. Кемерово вилояти — Кузбасснинг Ленинск-Кузнецкий шаҳридаги Кузбасс шахтёрлар соғлиғини сақлаш клиник марказининг интенсив нейрохирургия бўлимида даволанаётган эди.

Унинг хорижда даволаниши даврида Ўзбекистоннинг Бош консулхонаси, Миграция агентлигининг Новосибирскдаги ваколатхонаси ва Кемерово шаҳридаги ватандошлар ташкилоти томонидан зарур ёрдам кўрсатилди. Хусусан, Б.Т. даволаниш, дори-дармон ва озиқ-овқат билан таъминланди, унга ҳар кунлик қараб туриш ва парвариш қилиш ташкил этилди.

Шунингдек, Б.Т.ни Ленинск-Кузнецкий шаҳридаги клиникадан Новосибирскдаги «Толмачёво» аэропортигача олиб бориш учун ҳам қулай шароитлар яратилди.

Олинган жароҳатлар оқибатида Б.Т. мустақил ҳаракатлана олмагани инобатга олиниб, Миграция агентлиги томонидан уни ётган ҳолда транспортировка қилиш имконини берувчи авиачипталар харид қилинди.

Шу тариқа, ватандошимиз хориждаги даволанишидан сўнг тиббий ёрдамни Ўзбекистонда давом эттириш имконига эга бўлди.

Б.Т. хориждаги ватандошлар тақдирига кўрсатилаётган эътибор учун Ўзбекистон раҳбариятига миннатдорчилик билдирди.