Бу фавворалар билан шўхчан ўйнашаётган, кўнгилларга хушнудлик улашаётган насими найсон — янги Ўзбекистондаги улкан ислоҳотларнинг муаттар шабадаси. Қадимий иншоотлар, кўҳна деворлар пойида қад ростлаётган муҳташам мажмуалар эса биз интилаётган Учинчи Ренессанснинг мустаҳкам пойдеворига айланмоқда.

Фарғонанинг файзли саҳарида, мовий осмон остида нур таратаётган Марғилон шаҳрида яна бир маърифат қуёши чарақлади. Давлатимиз раҳбарининг вилоятимизга ташрифи ҳамда “Бурҳониддин Марғиноний” илмий-маърифий ва туризм мажмуасининг очилиши нафақат фарғоналиклар, балки бутун ислом олами, илм-фан аҳли учун тарихий шодиёнага айланди. Ушбу маскан ўтмишнинг олтин ҳалқалари билан эртанги куннинг ёрқин уфқларини бир-бирига боғлаган, аждодлар руҳини авлодлар шижоати билан туташтирган даргоҳдир.

Президентимизнинг мазкур тантанали маросимдаги ҳар бир сўзи, ҳар бир фикри зиммамизга улкан масъулият ва шараф юклади. Зеро, маърифат аҳли учун бу каби эътибор — ижодий парвозлар ва янги илмий кашфиётлар учун битмас-туганмас куч-қувват манбаи.

Мамлакатимиз ҳаётида тарихий воқеалар силсиласи давом этмоқда. Давлатимиз раҳбари “Бурҳониддин Марғиноний” илмий-маърифий ва туризм мажмуасининг тантанали очилиш маросимида “Бугун биз орзу қилаётган янги Бухорий, Термизий, Фарғоний, Хоразмий ва Марғинонийлар авлоди қаердан етишиб чиқади? Албатта, улар мана шундай маърифат, илм ва зиё масканларида тарбия топади”, деди. Бу сўзлар биз, олий таълим мутасаддилари ва профессор-ўқитувчилар зиммасига улкан вазифа юклайди.

35 гектар майдонда барпо этилган ушбу муҳташам мажмуа таркибидаги Ислом ҳуқуқшунослиги институти нафақат диний, балки ҳуқуқий ва ижтимоий фанлар ривожи учун ҳам пойдевор бўлади.

Йиллар давомида кўнглимизнинг туб-тубида бир армонли савол бизни қийнаб келар эди: нима учун дунё халқлари ўзларининг афсонавий қаҳрамонларини шунчалик эъзозлайдилару, биз жонли тарихимизга, миллий менталитетимиз тимсоли бўлган қаҳрамонларимизга келганда бир оз ортда қолмоқдамиз? Масалан, “Тарих отаси” дея эътироф этиладиган Геродот ҳақида ҳамма билади. Бугун Грециядаги Акрополга борган ҳар бир сайёҳга тоғ чўққисидаги улкан харсангни кўрсатиб, “Геродот айнан шу ерда ўтириб шогирдларига дарс берган”, дейишади. Бу шунчаки ривоят бўлса-да, бутун дунё унга ишонади, уни ҳурмат билан зиёрат қилади.

Хўш, шундай экан, нима учун ҳақиқий тарихий воқеаларга асосланган, ҳар бир жумласидан миллий ­ўзлигимиз уфуриб турадиган “Ўткан кунлар” асари қаҳрамонлари — садоқат ва муҳаббат тимсоли бўлган Отабек ва Кумушбиби яшаган Мирзакарим қутидор ҳовлисини улуғвор намунада барпо этмаслигимиз керак? Ахир Отабек тимсолида ўзбек йигитининг букилмас қадди ва ғурури, Кумушбиби сиймосида эса ўзбек қизининг тенгсиз ибоси ва юксак маънавий қиёфаси мужассам-ку!

Узоқ йиллар давомида концепция устида бош қотирилган, барчамизни ўйлантириб келаётган бу эзгу саволлар бугун ўзининг амалий жавобини топди. Президентимизнинг маърифат маскани — Фарғонага ташрифи арафасида айнан Марғилонда миллий қадриятларимиз акс этган бу каби обидаларнинг қад ростлаши биз — олимлар ва зиёлиларнинг кўнглини тоғдек кўтарди. Энди ушбу мажмуага келган ҳар бир ёш нафақат бинолар маҳобатини кўради, балки Абдулла Қодирий тасвирлаган ўша самимий ҳаётни, миллий ахлоқ-одобимизнинг юксак чўққисини ҳис қилади. Бу ҳовли шунчаки меъморчилик обидаси эмас, балки ўзлигимизга, тарихимиз ва келажак авлодлар тарбиясига садоқатимиз рамзидир. Бу маскан Фарғона давлат университети талабалари ва ёш олимлари учун ҳам чинакам амалиёт ва тадқиқот майдонига айланиши шубҳасиз.

Давлатимиз раҳбари эътироф этганидек, Фарғона бугун барча соҳада ўзининг тажриба мактабига эга бўлиб бормоқда. Риштон кулолчилиги, Қўқон ҳунармандчилиги ва Марғилоннинг ипакчилик анъаналари энди илмий асосда тадқиқ этилади. ­Президентимизнинг фарғоналик устоз санъаткорлар маҳорат мактабларини ташкил этиш бўйича ташаббуслари университетимизнинг санъатшунослик ва маданият йўналишлари учун янги уфқлар очади. Биз Жўрахон Султонов, Маъмуржон Узоқов каби буюк овоз соҳибларининг ­анъаналарини давом эттирадиган ёш истеъдод эгаларини тарбиялашда ушбу мажмуа имкониятларидан кенг фойдаланамиз.

Марғилон қадимдан “Маърифат аҳлининг ватани” деб аталган. Бугун эса ушбу ном замонавий инфратузилма, туризм салоҳияти ва илм-фан ютуқлари билан бойитилмоқда. Президентимиз ташаббуси билан барпо этилаётган “Янги Ўзбекистон” массивлари, АТ парклар ва таълим муассасалари Фарғонанинг қиёфасини тубдан ўзгартирмоқда. Бу ислоҳотлар замирида халқни рози қилиш мақсади мужассам.

Биз — Фарғона давлат университети жамоаси ­Президентимизнинг нутқидан келиб чиқиб қатор вазифаларни ўзимиз учун белгилаб олдик. Бурҳониддин Марғинонийнинг “Ҳидоя” асари ва бошқа ҳуқуқий меросини замонавий ҳуқуқшунослик билан боғлаган ҳолда тадқиқ этиш, мажмуанинг туризм салоҳиятини ошириш учун гид-таржимонлар тайёрлаш ва ҳудуд тарихини илмий асослаб бериш шулар жумласидан.

Ташриф вилоятимиз учун янги тараққиёт даврини бошлаб берди. Биз, зиёлилар ушбу эзгу ишларнинг фаол иштирокчиси бўлиб, янги Ўзбекистоннинг Учинчи Ренессанс пойдеворини қўйишда бор куч-ғайратимизни сафарбар этамиз.

Баҳодиржон ШЕРМУҲАММАДОВ,

Фарғона давлат университети ректори