Марказий банк тижорат банклари ва тўлов ташкилотларига юборган кўрсатмасида бундай ҳолатларга алоҳида эътибор қаратди. Унга кўра, электрон тизимда операциянинг «муваффақиятли» деб қайд этилгани мижозга нақд пул ҳақиқатда берилганини англатмайди.
Марказий банкка фуқаролардан картадан маблағ ечилгани, бироқ банкомат пул бермагани ҳақида мурожаатлар келиб тушмоқда. Айрим ҳолларда банклар операция муваффақиятли якунланганини электрон журналлар ва техник маълумотлар билан асослашга ҳаракат қилади. Аммо банкоматдаги носозликлар ёки зарур маълумотларнинг сақланмагани сабабли пул мижозга берилган-берилмаганини аниқлаш қийинлашади.
Марказий банкнинг муҳим талаби: банк ёки тўлов ташкилоти ўз хатоси учун мижозни жавобгар қилиб қўйиши мумкин эмас.
Хусусан, ташкилотнинг ўзи техник ва назорат талабларига риоя қилмагани сабабли низоли операцияни холисона текшириш имкони бўлмаса, бунинг оқибатларини истеъмолчи зиммасига юклашга йўл қўйилмайди.
Бундай мурожаатлар кўриб чиқилаётганда фақат электрон тизимдаги ёзувлар билан чекланиб қолмаслик керак. Банкоматдаги нақд пул қолдиғи, техник маълумотлар, электрон журналлар, видеёзувлар ва тўлов инфратузилмаси иштирокчиларининг маълумотлари ҳам текширилиши лозим.
Текширув натижаси бўйича мижозга аниқланган ҳолатлар ва хулоса чиқаришда фойдаланилган маълумотлар кўрсатилган жавоб берилиши шарт.
Агар операция ҳақиқатда лозим даражада бажарилмагани аниқланса, банк ёки тегишли тўлов ташкилоти мижознинг бузилган мулкий ҳуқуқларини тиклаши, яъни маблағни қайтаришни таъминлаши керак.
Қоидабузарликлар аниқланган тақдирда эса Марказий банк уларнинг хусусияти ва оқибатларидан келиб чиқиб, айбдор ташкилотларга нисбатан қонунчиликда белгиланган назорат ва жавобгарлик чораларини қўллайди.
