Бу ҳақда энергетика вазири Шерзод Хўжаев маълум қилди.
Лойиҳалар доирасида Фарғона вилоятида қуёш электр станцияси қуриш, Тошкент вилоятида трансформатор заводини барпо этиш ҳамда мис ўтказгичлар ишлаб чиқаришни йўлга қўйиш режалаштирилган.
Биринчи лойиҳа доирасида Фарғона вилоятининг Бешариқ туманида қуввати 500 мегаватт бўлган қуёш фотоэлектр станцияси ва уни электр тармоғига улаш учун узатиш линияси қурилади.
Ушбу лойиҳанинг қиймати 350 миллион доллардан ортиқ бўлиб, у «Voltamp» компанияси томонидан Ўзбекистоннинг «UET Construction» корхонаси билан ҳамкорликда амалга оширилади.
Дастлабки келишув имзоланган. 2027 йилнинг биринчи чорагига қадар тадқиқотлар ўтказилиб, молиявий модель ва тариф аниқланади. Тариф бўйича келишувга эришилгач, якуний шартномани 2027 йил январь–февраль ойларида имзолаш режалаштирилган.
Одатда бундай электр станцияларини қуриш 18–20 ой давом этади. Станция қурилишини 2027 йилда бошлаш ва 2028 йилда фойдаланишга топшириш мўлжалланган.
Иккинчи лойиҳа доирасида Тошкент вилоятининг Оҳангарон туманидаги электротехника саноат зонасида юқори кучланишли ва юқори қувватли трансформаторлар ишлаб чиқарадиган янги завод қурилади.
Лойиҳа «Voltamp» ва «Nur Elektrik» компаниялари ҳамкорлигида амалга оширилади. Заводда ишлаб чиқариладиган маҳсулотлар ички бозор ва экспорт учун мўлжалланган.
Учинчи лойиҳа «Voltamp» ва Ўзбекистоннинг «Texnokabel» компанияси ҳамкорлигида амалга оширилади. Унда трансформаторларда ишлатиладиган мис ўтказгичлар ишлаб чиқаришни йўлга қўйиш назарда тутилган.
Қайд этилишича, бундай ишлаб чиқариш ҳозирча мамлакатимизда мавжуд эмас.
Учта лойиҳанинг умумий инвестиция қиймати дастлабки ҳисоб-китобларга кўра, 500 миллион долларни ташкил этади.
Энергетика вазирининг таъкидлашича, мазкур ҳамкорликнинг муҳим жиҳати шундаки, хорижий инвестор маҳаллий компанияни биринчи марта пудратчи сифатида эмас, балки лойиҳаларнинг тенг ҳуқуқли ҳамкори сифатида жалб қилмоқда.