Бу Ҳукуматнинг 2026 йил 19 октябрдаги 574-сон қарорида белгиланган.
Қарор билан солиқ органлари ходимлари ҳамда мазкур шаҳарларда ҳисобга қўйилган жисмоний шахслар томонидан декларация тақдим этиш бўйича вақтинчалик маъмурий регламент тасдиқланган.
Регламент Навоий ва Чирчиқ шаҳарларида ички ишлар органлари томонидан доимий яшаш жойи бўйича рўйхатга олинган, 18 ёшга тўлган жисмоний шахсларга нисбатан татбиқ этилади. Бироқ ҳисобот йилида солиқ органига ишга қабул қилинган ва ҳисобга қўйилганига олти ой тўлмаган шахслар ушбу тартибга кирмайди.
2026–2027 йилларда олинган даромадлар бўйича декларация доимий яшаш жойидаги солиқ органига Солиқ қўмитасининг Электрон солиқ хизматлари портали ёки «Soliq» мобил иловаси орқали тақдим этилади.
Декларация ҳисобот йилидан кейинги йилнинг 1 апрелидан кечиктирмай юборилиши лозим. Солиқ органи бу ҳақда белгиланган муддатдан камида бир ой олдин хабарнома юборади.
Унда меҳнатга ҳақ тўлаш тарзидаги, мулкий, моддий наф тарзидаги ва бошқа даромадлар акс эттирилади. Шунингдек, кўчмас ва кўчар мулк, мажбуриятлар, жумладан, солиқлар, коммунал хизматлар ҳамда кредитлар бўйича харажатлар кўрсатилади.
Якка тартибдаги тадбиркорлар ва ўзини ўзи банд қилган шахсларнинг тадбиркорлик фаолияти билан боғлиқ харажатлари бундан мустасно.
Харажатлар вазирлик ва идоралар маълумотлари, шунингдек, «Soliq» мобил иловасида рўйхатдан ўтказилган фискал белгили чеклар ва электрон ҳисобварақ-фактуралар асосида шакллантирилади. Маълумотлар етарли бўлмаган тақдирда, фуқароларга мобил илова орқали қўшимча маълумот киритиш имконияти берилади.
Декларация нотўғри тўлдирилган бўлса, аниқлаштирилган ҳисобот тақдим этиш мумкин. Унда ҳам нотўғри маълумотлар кўрсатилган тақдирда, жисмоний шахснинг мурожаатига кўра декларация рад этилади. Бунда уни уч йил ичида қайта тақдим этиш имконияти берилади.
Регламентга мувофиқ, декларацияни бошқа асослар бўйича рад этиш тақиқланади.
Шунингдек, аниқлаштирилган солиқ базасига нисбатан қўшимча солиқ ҳисобланмайди. Бироқ Солиқ кодексининг 393-моддасида белгиланган даромадлар бундан мустасно. Ушбу ҳолатда ҳуқуқий таъсир чоралари ҳам қўлланилмайди.
