Янги пилот лойиҳа доирасида 40 нафар қишлоқ хўжалиги соҳаси мутахассиси Италияга мавсумий ишга юборилмоқда.
Иштирокчилар икки ой давомида итальян тилини ўрганиб, зарур тайёргарликдан ўтди. Улар 1 октябрдан Италиядаги SALVI ташкилотида мева-сабзавотларни қайта ишлаш соҳасида фаолият юритади.
Мавсумий меҳнат фуқароларга белгиланган муддат давомида қонуний ишлаш, даромад топиш ва хорижий тажриба орттириш имконини беради. Меҳнат шартлари якунланганидан сўнг улар Ўзбекистонга қайтиб, орттирган билим ва кўникмаларини кейинги фаолиятида қўллаши мумкин.
Пилот лойиҳа натижаларига кўра, келгусида Италияга ташкилий тартибда ишга юбориладиган фуқаролар сонини босқичма-босқич ошириш ҳамда янги меҳнат йўналишларини йўлга қўйиш режалаштирилган.
