Бу ҳақда «Дунё» АА хабар берди.
Давлат департаменти маълумотларига кўра, визаларни бекор қилишнинг аксарият ҳолатлари хорижликларнинг жиноий фаолияти билан боғлиқ. Шунингдек, виза талабларини бузиш, фирибгарлик, зўравонликка чақириқлар ва миллий хавфсизликка таҳдид сифатида баҳоланган бошқа ҳаракатлар ҳам визаларни бекор қилишга асос бўлган.
Визаларни бекор қилиш кўламининг кенгайиши Дональд Трампнинг ўтган йили Оқ уйга қайтганидан кейин бошланган кенг қамровли иммиграция сиёсати доирасида амалга оширилмоқда. Бу жараёнда АҚШдан кўплаб мигрантлар, жумладан, амалдаги визаси бўлган айрим шахслар ҳам депортация қилинган.
Давлат департаменти визаларни бекор қилиш хорижликларни мунтазам текшириш жараёнининг бир қисми эканини билдирди. Идорага кўра, бундай текширувлар виза эгаларининг белгиланган талабларга риоя қилишини ва АҚШ фуқаролари учун хавф туғдирмаслигини таъминлашга қаратилган.
Визаларни бекор қилишнинг энг кўп учрайдиган сабаблари орасида тан жароҳати етказиш, маст ҳолда автомобиль бошқариш, ўғрилик ва гиёҳванд моддалар билан боғлиқ жиноятлар бўйича айбловлар қайд этилган.
Давлат департаменти, шунингдек, номусга тегиш ва жинсий зўравонлик, одам ўғирлаш ва одам савдоси, болаларга нисбатан жинсий зўравонлик материалларини сақлаш каби оғир жиноятларда айбланган хорижликларга оид ўндан ортиқ ҳолатни мисол сифатида келтирган.
Идора АҚШ миллий хавфсизлигига таҳдид солиши мумкин деб баҳоланган хориж фуқаролари билан боғлиқ ҳолатларни аниқлаш ва текшириш ишлари давом эттирилишини маълум қилди.
«Америка визаси — бу имтиёз, ҳуқуқ эмас», — дея таъкидлаган Давлат департаменти визадан суиистеъмол қилган шахсларнинг ҳужжатларини бекор қилиш учун мавжуд ваколатлардан фойдаланиш давом эттирилишини билдирган.
Қайд этилишича, январь ойида Давлат департаменти 100 мингдан ортиқ виза бекор қилинганини маълум қилган ва бу ўша вақтда рекорд кўрсаткич бўлган. Шу билан бирга, АҚШ маъмурияти виза бериш жараёнида ижтимоий тармоқларни текшириш кўламини кенгайтириб, саралаш тартибларини кучайтирган.
