Ўзбекистоннинг Саудия Арабистонидаги элчихонаси минтақада сақланиб қолаётган кескинлик ва ҳаво қатновларида даврий равишда юзага келаётган ўзгаришлар муносабати билан ватандошларга мурожаат қилди. Бу ҳақда «Дунё» ахборот агентлиги хабар берди.
Дипломатик ваколатхона маълумотига кўра, Саудия Арабистонида ички вазият барқарорлигича қолмоқда. Жамоат хавфсизлигига таҳдидлар ёки махсус чеклов чоралари қайд этилмаган.
Шу билан бирга, умумий минтақавий вазият парвозлар логистикаси, транзит йўналишлари ва кутиш вақтларига таъсир қилиши мумкин. Бу эса авиарейсларнинг кечикиши, йўловчиларнинг бошқа рейсларга ўтказилиши ёки парвоз йўналишларининг ўзгаришига олиб келиши эҳтимоли бор.
Элчихона ватандошларга хорижга сафар қилишдан олдин авиарейслар жадвали, парвоз йўналишлари ва транзит қоидаларидаги ўзгаришларни текширишни тавсия этди.
Шунингдек, қуйидаги хавфсизлик чораларига амал қилиш сўралди:
- Саудия Арабистони ва Яман ўртасидаги чегара ҳудудларига яқинлашмаслик;
- маҳаллий ҳокимият органларининг хавфсизлик бўйича кўрсатмаларига қатъий риоя қилиш;
- ҳарбий объектлар ва турли ҳодисалар оқибатларини тасвирга олмаслик;
- текширилмаган маълумотларни тарқатмаслик ва расмий ахборот манбаларидан фойдаланиш;
- шахсни тасдиқловчи ҳужжатларни доимо ёнингизда олиб юриш.
Ўзбекистон элчихонаси ва Бош консулхонаси ватандошларга зарур ҳолларда қуйидаги рақамлар орқали боғланишни тавсия этди.
Ўзбекистоннинг Ар-Риёздаги элчихонаси:
- Телефон: +966 11 263 52 23
- Консул: Шуҳрат Ибрагимов
- Telegram / WhatsApp: +966 56 721 77 31
Ўзбекистоннинг Жиддадаги Бош консулхонаси:
- Телефон: +966 12 607 72 50
- Консул: Азимжон Қобилжонов
- Telegram / WhatsApp: +966 59 439 08 50
Элчихона барча ватандошларни эҳтиёткор бўлишга, расмий ахборотларни кузатиб боришга ҳамда тинчлик ва хавфсизлик қоидаларига қатъий амал қилишга чақирди.
