Ўзбекистон миллий терма жамоаси ноябрь ойидаги халқаро ўртоқлик учрашувларини навбатдаги ғалаба билан давом эттирди. Фабио Каннаваро бошчилигидаги футболчиларимиз Қатар майдонларида Саудия Арабистони устидан 1:2 ҳисобида зафар қучди.
Ар-Райян шаҳридаги "Жассим бин Ҳамад" стадионида ташкил этилган учрашувда жамоамизнинг ҳар икки голига Шерзод Эсанов муаллифлик қилди.
Биринчи бўлимнинг ўрталарида Ўзбекистон ҳисобда олдинга чиқди. 19-дақиқада саудияликлар дарвозабонининг хатосидан унумли фойдаланган Эсанов тўпни дарвозага йўллади.
Рақибнинг жавоб қайтариши учун кўп вақт талаб этилмади. Орадан тўрт дақиқа ўтиб, Фирас Ал-Бурайкан бош билан йўллаган аниқ зарбаси орқали мувозанатни тиклади.
Бироқ танаффусга қадар устунлик яна Ўзбекистон томонига ўтди. 35-дақиқада стандарт вазиятдан кейин жарима майдонида қулай имкониятга эга бўлган Шерзод Эсанов иккинчи голини уриб, дублни расмийлаштирди.
Иккинчи бўлимда саудияликларнинг вазифаси янада мураккаблашди. 51-дақиқада ҳимоячи Али Лажами қизил карточка олиб, майдонни тарк этди.
Бир киши кўп бўлиб ҳаракат қилган Ўзбекистон терма жамоаси қолган дақиқаларда ҳисобдаги устунлигини сақлаб қолишга муваффақ бўлди.
Шу тариқа, футболчиларимиз 1:2 ҳисобида ғалаба қозониб, навбатдаги халқаро ўртоқлик учрашувини муваффақиятли якунлади.