Бугун институт нафақат таълим маскани, балки педагог кадрлар тайёрлаш бўйича илғор хорижий тажриба ва замонавий таълим дастурларини амалиётга татбиқ этаётган, ўз касбининг етук мутахассисларини тарбиялашга хизмат қилаётган нуфузли олий таълим муассасасига айланди. Энг муҳими, бу ерда жамият тараққиётига муносиб ҳисса қўша оладиган, билимли ва ташаббускор ёшлар камол топмоқда.

Ўтган 4 йилда институтда илмий, ўқув-услубий, маънавий-маърифий ҳамда молиявий-хўжалик йўналишларида қатор йирик лойиҳалар амалга оширилди. Педагогика соҳасида замонавий ёндашувларни жорий этиш, таълим сифатини ошириш ва янги авлод педагогларини тайёрлаш борасида муҳим натижаларга эришилди.

Айни пайтда институтда педагогика, аниқ ва табиий фанлар, филология, ижтимоий ва амалий фанлар ҳамда бошланғич таълим факультетлари мавжуд. Уларда 9000 га яқин талаба таҳсил олмоқда. Шунингдек, 15 кафедрада 205 нафар профессор-ўқитувчи фаолият кўрсатмоқда. Улардан 86 нафари илмий даражали, 45 нафари профессор ва доцент илмий унвонига эга. Институтда 19 таълим йўналиши ва 16 магистратура мутахассислиги бўйича кадрлар тайёрланмоқда.

Бугун олий таълим муассасасида 7 ихтисослик бўйича 160 га яқин таянч докторант ва мустақил изланувчилар тадқиқот ишларини олиб бормоқда. Таълим муассасасида “Урганч давлат педагогика институти ахборотномаси” ҳамда “Ўзбекистон олимларининг илмий-амалий тадқиқотлари” илмий-назарий, методик журналлари фаолияти йўлга қўйилган. Урганч давлат педагогика институтини ривожлантиришдаги мақсадли кўрсаткичларга мувофиқ, 2023 йилда илмий салоҳиятни 15, 2024 йилда 18, 2025 йилда 25 фоизга кўтариш белгиланган эди. Амалда илмий салоҳият мос равишда 17, 21 ва 27 фоизга етказилди. 2026 йил июнь ҳолатига кўра, илмий салоҳият 42 фоизни ташкил этмоқда.

Институт қисқа муддатда халқаро майдонда ҳам мустаҳкам ўрин эгалламоқда. Жумладан, 2022-2025 йилларда 20 та хорижий давлатдаги олий таълим муассасалари ва ташкилотлари билан жами 70 та ҳамкорлик битими имзоланди. Бугунга келиб ОТМ UI GreenMetric халқаро университетлар рейтинги, Times Higher Education ташкилоти рейтинги ҳамда Евроосиё педагогика университетлари ассоциациясига аъзо таълим муассасаси сифатида киритилди. Ҳозир институт ҳудудида 5 та ўқув биноси фаолият юритмоқда. Ҳар бир аудитория замонавий ўқув жиҳозлари билан таъминланган. Янги ўқув йилидан 7 қаватли замонавий ўқув биноси келгусида янги ташкил этилаётган олий мактаб ва янги таълим йўналишлари учун муҳим инфратузилмавий асос бўлиб хизмат қилади.

2026/2027 ўқув йилида Урганч давлат педагогика институтида 21 та йўналиш бўйича кундузги таълим шаклига 1000 нафар ҳамда 9 та йўналиш бўйича кечки таълим шаклига 300 нафар абитуриентни қабул қилиш кўзда тутилган. Жумладан, янги ўқув йилидан институтнинг Аниқ фанлар педагогика олий мактаби негизида очилиши кутилаётган сунъий интеллект ҳамда ахборот тизимлари ва технологиялари таълим йўналишларининг ҳар бирига 50 нафардан абитуриент қабул қилиниши кутилмоқда.

Аниқ фанлар педагогика олий мактабининг янги таълим йўналишларини очиш билан бирга, ушбу тизим орқали ўқув дастурларини янгилаш, амалий ва лаборатория машғулотларини кучайтириш, профессор-ўқитувчилар салоҳиятини ошириш, LMC ва HEMIS тизимлари асосида ўқув жараёнини рақамлаштириш, талабалар фаолиятини мониторинг қилиш ҳамда сифат назоратини кучайтириш кўзда тутилган.

Айни пайтда институтда LMC тизимини жорий этиш бўйича ҳам амалий ишлар бажарилмоқда. Трансформация бўлими томонидан LMC платформасининг ўқув бўлими, деканат, HEMIS интеграция, дарс жадвали, талабалар ва ўқитувчилар профили, фанлар, давомат, баҳолаш, статистика, якуний назорат, қайта ўқиш, магистратура ва тузилма модуллари босқичма-босқич ўрганилмоқда. Шунингдек, магистратура мутахассислигининг 16 ихтисослиги бўйича 105 номзод қабул қилиш кўзда тутилган.

Президентимизнинг 2026 йил 5 февралдаги тегишли фармонига асосан 2026/2027 ўқув йилидан бошлаб педагогика олий таълим ташкилотларининг мактабгача таълим йўналишида бакалаврларни дуал таълим шакли бўйича тайёрлаш белгиланган. Хусусан, Урганч давлат педагогика институтида ҳам дуал таълим шакли бўйича 700 абитуриентни талабаликка қабул қилиш режалаштирилган. Мазкур таълим шаклига қабул қилишда мактабгача таълим ташкилотида 3 йиллик педагогик иш стажи талаб қилинади. Абитуриентлар ҳамда уларнинг ота-оналарига қабул жараёни бўйича тезкор ва сифатли ахборот бериш мақсадида институтда ишонч телефони ишга туширилган. У орқали қабул жараёни, ҳужжат топшириш, касбий (ижодий) имтиҳонлар ҳамда таълим йўналишларига оид мурожаатларга мунтазам жавоб бериб борилмоқда.