Тадбир Кумушкон маҳалласидаги “Олтин бел” сайёҳлик мажмуасида бўлиб ўтди.

Давлатимиз раҳбари бир йил аввал ушбу ҳудудда йирик туризм мажмуасини барпо этиш вазифаси қўйилганини қайд этди. Маҳаллий лойиҳачилар, қурувчилар ва ишлаб чиқарувчиларга имконият берилгани натижасида қисқа муддатда 47 гектар майдонда замонавий дам олиш маскани бунёд этилди.

Мажмуа бир вақтнинг ўзида 6 минг нафар инсонга хизмат кўрсатиш имкониятига эга. Бу ерда 600 та иш ўрни яратилиши кўзда тутилган, 300 нафар мутахассис тайёрланган. Қурилиш ва жиҳозлашда маҳсулотларнинг 95 фоизи маҳаллий корхоналардан олингани лойиҳа таннархини 20 фоизга арзонлаштириш имконини берди.

Ушбу тажрибани бошқа ҳудудларда ҳам кенг қўллаш, қурилиш индустрияси ва туризмни бир-бирини тўлдирадиган, ўзаро янги имкониятлар яратадиган соҳаларга айлантириш зарурлиги таъкидланди.

Учрашувда дастлаб қурилиш материаллари саноатида эришилган натижалар ва мавжуд имкониятлар таҳлил қилинди.

Сўнгги ўн йилда соҳага 12 миллиард доллар инвестиция киритилиб, 5 мингдан зиёд замонавий корхона ишга туширилди. Жорий йилда ишлаб чиқариш ҳажми 2016 йилдаги 7 триллион сўмдан 65 триллион сўмга, экспорт эса 75 миллион доллардан 1,5 миллиард долларга етиши кутилмоқда.

Мамлакатимизда амалга оширилаётган кенг кўламли қурилишлар ва инвестиция лойиҳалари маҳаллий маҳсулотлар учун катта бозор яратмоқда. Қўшни давлатлар ва яқин минтақаларда ҳам бу маҳсулотларга талаб юқори.

Юқори қўшилган қийматли маҳсулотлар ишлаб чиқаришни кўпайтириш, маҳаллий корхоналарнинг ташқи бозорларга чиқишини қўллаб-қувватлаш ва логистика имкониятларини кенгайтириш орқали соҳа экспортини яқин йилларда 5 миллиард долларга етказиш мумкинлиги билдирилди.

Қолаверса, маҳсулотлар сифати, дизайни ва рақобатбардошлигини ошириш долзарб вазифа бўлиб қолмоқда. Юртимизда 161 турдаги қурилиш материали бўйича ички талабни қоплашга етарли қувватлар яратилган бўлса-да, айрим маҳсулотлар импорти йилига 780 миллион долларни ташкил этмоқда.

Шу боис, ички бозор эҳтиёжларини чуқур ўрганиш, замонавий технологиялар ва халқаро брендларни жалб этиш асосида янги ишлаб чиқариш қувватларини яратиш вазифаси қўйилди. Бу борада Туркиянинг “Betek” компанияси билан Зангиота туманида 30 миллион долларлик лок-бўёқ заводи қурилиши бошланаётгани қайд этилди.

Йирик стратегик лойиҳаларни маҳаллий қурилиш материаллари билан таъминлаш масаласига алоҳида эътибор қаратилди. Жумладан, Жиззах вилоятидаги атом электр станцияси қурилиши учун 2,2 миллиард долларлик қурилиш материаллари талаб этилади.

Шу мақсадда Эгизбулоқ маҳалласида 200 гектар майдонда махсус саноат зонаси ташкил қилиниб, 70 турдаги янги маҳсулот ишлаб чиқариш режалаштирилган. Мутасаддиларга импорт ўрнини босувчи ва йирик лойиҳаларда талаб юқори бўлган маҳсулотларни аниқлаб, умумий қиймати 20 миллиард долларлик лойиҳалар бўйича амалий ишларни бошлаш топширилди.

Янги турдаги юқори қўшилган қийматли маҳсулотлар ишлаб чиқариш учун имтиёзли молиявий ресурслар ажратиш, корхоналарнинг энергия тежовчи ускуналар хариди билан боғлиқ харажатларини қисман қоплаш чоралари ҳам белгиланди.

Пардозбоп тошлар саноатида хомашёни чуқур қайта ишлаш ва чиқиндилардан самарали фойдаланиш имкониятлари кўриб чиқилди. Янги конларни “ноль чиқинди” тамойили асосида ўзлаштириш, мавжуд конлар атрофида қайта ишлаш корхоналарини ташкил этиш вазифалари қўйилди.

Давлатимиз раҳбари қурилиш таннархини пасайтириш ва бюджет маблағларидан оқилона фойдаланиш масалаларига ҳам тўхталди. Айрим ҳудудларда ўхшаш объектлар қурилиши қиймати сезиларли фарқ қилаётгани, бунга ортиқча воситачилар ва лойиҳа-смета ҳужжатларининг қайта-қайта ўзгартирилиши сабаб бўлаётгани танқид қилинди.

Келаси йилдан бюджет маблағлари ҳисобидан амалга ошириладиган қурилишларда биринчи навбатда маҳаллий маҳсулотлардан фойдаланиш талаби жорий этилади. Давлат харидлари порталида маҳаллий ишлаб чиқарувчилар учун махсус савдо майдончаси ташкил қилинади.

Шунингдек, Янги Тошкентда қурилиш ишларини олиб бораётган тадбиркорларга маҳаллий материаллар харидига йўналтириладиган 200 миллион долларлик кредит линияси очилади.

Қурилиш материаллари сифатини назорат қилиш ва аҳолини хавфли маҳсулотлардан ҳимоялаш мақсадида Тошкент шаҳри, Фарғона ва Самарқандда учта замонавий синов лабораторияси ташкил этилади. Лойиҳа институтларини трансформация қилиш, қурилишга илғор технологияларни жорий этиш ва бу жараёнга хусусий инвесторларни жалб этиш вазифалари ҳам белгиланди.

Учрашувнинг кейинги қисми туризмни ривожлантириш, хизматлар сифатини ошириш ва соҳага инвестициялар жалб этиш масалаларига бағишланди.

Жорий йил бошидан мамлакатимизга 11,6 миллион нафар хорижлик сайёҳ ташриф буюрди. Сўнгги икки йилда узоқ хориждан келаётган туристларнинг юртимизда бўлиш муддати ўртача 6,5 кундан 8 кунгача узайди. Тўлов қобилияти юқори сайёҳлар улуши 14 фоиздан 21 фоизга, бир турист сарфлайдиган ўртача маблағ эса 21 фоизга ошди.

Президентимиз туризмда энди асосий эътиборни сайёҳлар сони билан бирга хизматлар сифатига, уларнинг мамлакатимизда узоқроқ қолиши ва кўпроқ харажат қилиши учун шароит яратишга қаратиш зарурлигини таъкидлади.

Бунинг учун соҳада тадбиркорликни рағбатлантириш чоралари кенгайтирилмоқда. Меҳмонхона қурилиши учун имтиёзли молиявий ресурслар ажратилмоқда, ер ва мол-мулк солиғи бўйича енгилликлар 2030 йилгача узайтирилган. Туроператорлар ва туристик транспорт хизматлари учун ҳам қўшимча имтиёзлар жорий этилган.

Яқин вақтда қабул қилиниши режалаштирилган туризмни ривожлантириш стратегияси доирасида хорижлик сайёҳлар сонини 20 миллион нафарга, соҳанинг иқтисодиётдаги улушини 7 фоизга, туризм хизматлари экспортини эса 10 миллиард долларга етказиш мақсад қилинмоқда.

Янги инвестиция лойиҳаларини амалга ошириш учун ҳудудларда қўшимча 5 минг гектар ер майдони тайёрланади. Шунингдек, шакллантирилган 11 миллиард долларлик туризм лойиҳалари бўйича бир ой ичида амалий ишларни бошлаш топширилди.

25-27 ноябрь кунлари Тошкент шаҳрида ўтказиладиган туризм соҳасидаги биринчи халқаро инвестиция форуми янги лойиҳаларни илгари суриш учун муҳим имконият экани қайд этилди. Унда 25 дан ортиқ давлатдан 100 дан зиёд йирик инвестор иштирок этиши кутилмоқда. Ҳудудлар раҳбарлари олдига форумда аниқ инвестиция келишувларига эришиш вазифаси қўйилди.

Сайёҳлик масканларининг йил давомида фаолият юритишини таъминлаш, савдо ва кўнгилочар хизматларни кўпайтириш, мавжуд инфратузилмадан самарали фойдаланиш зарурлиги таъкидланди.

Ҳудудлардаги конгресс марказлари, меҳмонхоналар ва туризм мажмуаларида йирик халқаро тадбирларни мунтазам ўтказишга ҳам алоҳида эътибор қаратилди. Бундан буён ҳар бир вазир ўз соҳаси бўйича халқаро ташкилотларнинг йилига камида 3-4 та йирик тадбирини мамлакатимизда ўтказишга масъул бўлади. Ҳукуматга бу борада икки йиллик режани тасдиқлаш топширилди.

Туризмнинг янги йўналишларини ривожлантириш доирасида ҳаво шарлари, параплан ва дельтаплан хизматларини йўлга қўйиш имкониятлари муҳокама қилинди. Бу фаолият учун рухсат олиш тартибини енгиллаштириш ва келаси йил ҳар бир ҳудудда камида битта шундай хизмат кўрсатиш масканини ташкил этиш вазифаси белгиланди.

Туристик манзилларга транспорт қатновларини сайёҳлар эҳтиёжига мослаштириш масаласига ҳам эътибор қаратилди. Айрим йўналишларда поездларнинг бориш ва қайтиш вақти туристларнинг ҳудуд билан тўлақонли танишишига имкон бермаётгани қайд этилди. Мутасаддиларга бир ой ичида темир йўл ва ички авиақатновлар жадвалини қайта кўриб чиқиш топширилди.

Халқаро авиақатновлар географиясини кенгайтириш ҳам муҳим вазифа сифатида белгиланди. Ҳозир Ўзбекистондан дунёнинг 102 та шаҳрига тўғридан-тўғри рейслар мавжуд. Хорижий авиакомпанияларни янги йўналишларга жалб этиш, жумладан, “бешинчи ҳаво эркинлиги” имкониятларидан фойдаланиш бўйича кўрсатмалар берилди.

Шунингдек, сайёҳлар учун қулай тўлов хизматларини йўлга қўйиш, халқаро тўлов тизимлари билан интеграцияни кенгайтириш ва туристик масканларда кўчма савдо нуқталарини кўпайтириш чоралари белгиланди.

Давлатимиз раҳбари туризм соҳасида фидокорона меҳнат қилаётган мутахассисларни рағбатлантириш масаласига ҳам тўхталди. “Ўзбекистон Республикасида хизмат кўрсатган туризм ходими” фахрий унвонини таъсис этиш ташаббуси доирасида соҳа ривожига муносиб ҳисса қўшган ходимларни Мустақиллик байрами арафасида тақдирлаш таклиф қилинди.

Учрашув якунида Президент Шавкат Мирзиёев инвестор ва тадбиркорлар билан очиқ мулоқот ўтказиб, уларнинг фикр-мулоҳазалари ва таклифларини тинглади.

Шунинг билан давлатимиз раҳбари Паркент туманига ташрифини якунлаб, Тошкентга қайтиб келди.